Inicio > Chigres > Nuevo Llagar, tradición anovada
ChigresEncamientosGastronomía

Nuevo Llagar, tradición anovada

La Sidrería-Parrilla Nuevo Llagar, un referente al pie los Pericones.

LA SIDRA.- Güei toca falar, y bien prestosamente, del Nuevo Llagar, local naguráu apocayá polos dueños del Viejo Llagar, nel xixonés barriu de Pumarín.

Ésti últimu, asitiáu na cai Andalucía yá cuntaba cola fama de ser un restorán onde xintar bien, y non yá de carta, sinón con menús bien apeteceores y algamaizos inclusive en feches señalaes como Comadres. La so variedá de pinchos, la so bona sidra Peñón, Viuda de Angelón y, apocayá, Contrueces y la so atención nun pasen desapercibíos.

Nel casu’l Nuevu Llagar, na cai Gaspar García Llaviana, mui cerca’l parque los Pericones, caltiénense fieles a un palu sidre, Peñón, y la so decoración nun dexa llugar a duldes: una sidre especial, con bon pegue y un saborgu dulce que convida a tomar más.

Pesia cuntar con un estupendu menú de domingu nel que s’ufiertaben trés platos más postre por 17 euros (¡güeyu, incluyendo sidre!), decidímosmos a tastiar la so carta. De primeru, pastel de tiñósu: dos porciones grandes de testura nidia, mueyu rosa y mayonesa y una considerable ración de biscottes para nun tener que dicir aquello de: “¿Pues trayeme unos pocos más?”.

Siguimos con una ración de calamares frescos, presentaos en platu pizarray una mini-cesta de freidora fasta enriba de productu frescu y cruxente, acompangáu d’ensalada y unu mueyu alioli con un puntu picante bramente bonu.

Y acabamos con un secretu ibéricu impresionante: de gran tamañu, a pesar de que mos lu encamentaren pa una presona, perfeutamente plancheáu y bien xugosu, sirvíu sobro cama de pataques cruxientes y compota mazana. Una delicia pa los sentíos.

Trés comensales. Trés raciones. Nun pudimos llegar al postre. Y non porque nun fueren apeteceores, sinón porque nun podíemos más. Una bona escusa pa repitir la esperiencia.

Que bien podría ser mientres estes fiestes, nes qu’ufierten un menú especial de Nuechebona qu’inclúi llagostinos a la chapa y crema andariques y cigales d’entrante; salpicón de pixín de primeru; llinguáu rellenu mariscu en mueyu de llagostinos de segundu; pierna de llechal rustía en mueyu con patatinos de terceru; y pa detrás, surtíu de turrones y polvorones. Tou ello, pa llevar, por 35€ y cola posibilidá de pidir namás un platu. ¿Per dacual nagües?

(Visited 2.465.301 times)
Compartir
A.M.V.
https://www.lasidra.as
Nacía en Xixón en 1973, fice los estudios de Filoloxía Inglesa nes Universidaes de Uviéu y Bradford (Reinu Xuníu). Trabayé de profesora d'inglés, guía ya intérprete y tradutora. Soi una gran aficionada a la sidre y al bon xintar. Sígueme na ueb www.ciderayalga.com

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies