Inicio > AS > Noticies > Muséu de la Sidre. Más incompetencies
Noticies

Muséu de la Sidre. Más incompetencies

L’aconceyamientu del alcalde navetu col presidente del “Principado” confirma la falta de compromisu istitucional, y d’un proyeutu de futuru.

LA SIDRA – El llamentable boquiar del Muséu de la Sidre de Nava tuvo una nuea espresión nel aconceyamientu de Juan Cañal, alcalde de Nava, con Javier Fernández, presidente del “Principado” marcando ún de los sos más esperpénticos capítulos, onde non solo nun se-y espunxo al presidente del “Principado” la so responsabilidá pol incumplimientu del sofitu económicu comprometíu pola istitución –alcalde y presidente son del mesmu partíu- sinon que se pretendió treslledar la responsabilidá a los llagareros y reiteróse la propuesta d’integralu na sociedá pública de xestión y promoción turístico y cultural Recrea, lo qu’en principiu taría a la escontra de los fines estaturarios de la Fundación de la Sidre.

 

Nesta escenificación d’incompentencia, non solo s’obvió la responsabilidá del “Principado” na situación del Muséu, y la de la propia Fundación de la Sidre, sinon que pretendió treslladase la responsabilidá a los llagareros, con afirmaciones comu “los llagareros tienen que vivir su muséu y revitalizalu”.

Ye cierto que la implicación del seutor –tol seutor sidreru, non solo los llagareros- ye importante, pero yelo más que la responsabilidá principal ye de la propia Fundación, y de los sos patronos, principalmente de les istituciones que tan ellí representaes y que nun cumplen col sofitu apallabráu. Pero perriba de too, hai que dexar nidio, qu’a la escontra de lo afirmao, el Muséu, nun ye de los llagareros, ensiquiera nel sentíu más figurativu, sinon del conxuntu de los asturianos y asturianes, protagonistes y creadores de la cultura asturiana de la sidre, y per ende, el principal compromisu tien de ser istitucional.

Un resume de la situación del Muséu de la Sidre de Nava pue ves nel artículu ¿Hay luz al final del tunel?, espublizáu en el númberu 144 de LA SIDRA, d’Avientu 2015

 

sidre, sidra, sidro, cider, cidre, sagardoa, Apfelwein, Píngguǒ jiǔ, cidro, siideri, seidr, leann úll, Saidā, sider, jablečné víno, jabłecznik, sydr

(Visited 672.697 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies