Inicio > AS > Eventos > Los llagareros asturianos valoren el so pasu per XXX Salón de Gourmets
Eventos

Los llagareros asturianos valoren el so pasu per XXX Salón de Gourmets

Tocantenes a los certames de la feria, Quesos El Rei Silu ganó per segunda ocasión el Campionatu de los Meyores Quesos d’España 2016, na categoría pastia blanda / tortas, cola so creyación “El Besu del Rei Silu”.

LA SIDRA.- Nel postrer díi de Salón de Gourmets los visitantes aprofitaron al másimu la xornada pa interesase y solicitar información polos productos espuestos, amás d’esfrutar de les actividaes qu’ufierten tantu los entamaores del alcuentru comu los espositores. Dempués de cuatro xornaes d’actividá, los llagareros asturianos dieron a la revista LA SIDRA les sos impresiones sobro’l desendolcu d’esta edición.

 

Julián Castañón, de Sidre Castañón, señaló qu’el so oxetivu al venir a esta feria yera dar a conocer el so vermú de sidre Roxmut. “Al stand averóse xente que venía guetándolu específicamente” y hai de destacar que foi ún de los productos que más sosprendió a les presones que pasaron pol stand d’Asturies. Ello ye que Julian Castañón, indicó qu’en curtiu va escomenzar a unviar Roxmut a Madrid.

Tino Cortina, de Sidre Cortina, declaró sentise satisfechu con Salón de Gourmets. Tres 18 ediciones allegando a esta cita, Sidre Cortina sabe qu’ún de los principales reclamos nel espositor ye poder echar sidre pa qu’asina esta pueda apreciase “na so másima espresión”. Asina, los qu’allegaben al stand pa beber un culín, pudieron tastiar la so sidre natural y la so sidre DOP Villacubera, natural y de copa.

Contentos tamién manifestaron sentise en Sidre Trabanco. Isabel Trabanco, la so direutora, desplica qu’esta feria permite-yos axuntar a munchos de los sos veceros, y non solo los de Madrid, sinón tamién d’otres comunidaes. Amás tamién consiguieron veceros potenciales. Avalon, el so productu más recién, causó bien bona impresión. “Sospriende qu’una sidre esplumoso semidulce tenga esi calter tan asturianu” afirma Isabel Trabanco. Los asistentes tamién pudieron probar la so sidre natural y la natural “collecha propia” que, detalla, Isabel, ca vegada se valora más nel mercáu madrilanu.

Pela so parte, Francisco Ordónez de Sidre Viuda de Angelón, valoró tamién positivamente la so presencia nel Salón, pero quinxo dexar nidio’l so malestar pola llocalización del stand del “Principado”. “Ye ún de los peores sitios” sentenció. Salón de Gourmets cuntó pa la so realización con tres pabellones del IFEMA, el 4, el 6 y el 8. L’espositor del “Principado” atopábase nel pabellón 6. Taba al fondu d’esti y cuasique na esquina izquierda. Esta zona nun yera un llugar onde hubiera muncha circulación  por cuenta de que’l pasu ente pabellones taba al entamu de les recintos. Per otru llau, l’espaciu onde se desendolcaron la mayoría de les meses reondes, concursos y tasties foi’l pabellón 8,  mentes que’l pabellón 4 cuntaba cola ventaxa de ser la primer zona a la que llegaben los visitantes. Amás, a diferencia d’otres Comunidaes Autónomes, l’espositor del “Principado” nun cuntó con estructures lluminoses colgantes y/o pegaes al techu nes que s’indicara la llocalización d’Asturies.

Y tocantenes a los certames, Quesos El Rei Silu tornó dar una allegría a Asturies al ganar per segunda ocasión el Campieonatu de los Meyores Quesos d’España 2016, na categoría pastia llandia / tortes, cola so creación El Besu del Rei Silu. “Salón de Goumets ye la meyor feria cola que cuntamos los queseros artesanos, y ye un arguyu tornar a algamar la medalla d’oru, sobromanera compitiendo con otros grandes quesos” dixo pa la revista LA SIDRA Pascual Cabaño. 

(Visited 598.585 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies