Inicio > Llagares > La Xunta Xeneral a favor del seutor de la sidre y la mazana
Llagares

La Xunta Xeneral a favor del seutor de la sidre y la mazana

La Moción presentada por Adrián Pumares –FORO Asturies-, foi aprobada por unanimidá pol plenu de la Xunta Xeneral pa que’l Gobiernu del “Principado” dea al seutor de la sidre y la mazana la importancia que rialmente merez, dao la so importancia cultural y el so impautu económicu.

LA SIDRA.- La Moción aprobada apura la puesta en marcha d’un braeru ‘Plan Estratéxicu del seutor de la mazana y la sidre n’Asturies’, que permita encarar con ésitu los grandes retos que tien per delantre. Asina mesmo plantega la necesidá d’una llínia d sovenciones que permita retirar de los llagares les sidres naturales más antigües y de menor calidá, ameyorando asina la calidá de les sidres y favoreciendo la merca de mazana asturiano.

Per otra parte, esta Moción tamién recueye la necesidá d’una campaña d’información respeutu a la obligatoriedá d’inscripción de los pumareros nel REXEPA, y la implementación de nueva ufierta formativa rellacionada col seutor de la sidre, en tola so cadena de valor.

 El dirixente forista esbilló demientres la so intervención los cuatro puntos de la so iniciativa, desplicando que “la nuesa Moción apura la puesta en marcha d’un braeru ‘Plan Estratéxicu del seutor de la mazana y la sidre n’Asturies’, que permita al seutor encarar con ésitu los grandes retos que tien per delantre”. Pumares recordó que “yá nel añu 2018, la entós Direutora Xeneral de Desencolcu Rural afirmaba que se taba trabayando en conocer cuáles yeren les necesidaes, faltes y previsiones del seutor de la sidre pa la ellaboración d’un plan estratéxicu del seutor, pero’l plan realizóse, y darréu dempués guardóse nun caxón, que ye onde sigue anguañu. Por ello, desiximos l’actualización y puesta en marcha d’esi Plan estratéxicu, en collaboración colos axentes implicaos”.

El voceru de FORO Asturies tamién afirmó que “consideramos imprescindible que s’implemente, de manera estructural, una llínia de sovenciones que permita retirar de los llagares les sidres naturales más antigües y de menor calidá, ameyorando asina la calidá de les sidres y favoreciendo la merca de mazana astutiano”. Nesti senu, Pumares llamentó que “otros seutores, como’l vinu y l’aceite, ya inclusive otros países, yá cunten con llínies de sovenciones asemeyaes”.

Al traviés d’otru de los puntos de la moción, el diputáu de FORO Asturies consideró que “la obligatoriedá d’iscripción de los llagareros nel RExEPA puede llegar a enzancar la vienta de mazana asturiano a los llagares, polo que resulta imprescindible una campaña d’información al respeutu”. A lo cabero, Adrián Pumares reclamó que “el Gobiernu asturianu tien d’estudiar la implementación de nueva ufierta formativa rellacionada col seutor de la sidre, en tola so cadena de valor”.

 

MOCIÓN ÍNTEGRA DE FORO ASTURIES

La Xunta Xeneral del Principáu d’Asturies encamienta al Conseyu de Gobiernu a:

PRIMERO.- .- Actualizar y poner en marcha, en collaboración colos axentes implicaos, el Plan Estratéxicu del seutor de la mazana y la sidre n’Asturies’, encetando, ente otres custiones, la comercialización y el preciu d’esti productu, darréu que son dos de los principales problemes  colos que cunten les sidres que s’ellaboren nel Principáu.

SEGUNDU.- Implementar una llínia de sovenciones qu’aíde a retirar de los llagares les sidres naturales más antigües y de menor calidá, collaborando asina a la meyora del productu y facilitando la compra de mazana asturiana, especialmente nos años de bona collecha.

 TERCERU.- Aplicación gradual de la obligatoriedá d’inscripción nel Rexistru Xeneral de la Producción Agrícola (REGEPA) de los pumareros, rializando una campaña de comunicación sobro esta obligación qu’evite situaciones d’imposibilidá de vienta de mazana asturiana per parte de los cosecheros.

CUARTU.- Estudiar la implementación nel Principáu d’Asturies de nueva ufierta formativa rellacionada col seutor de la sidre.

 


(Visited 2.466.707 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies