Inicio > AS > Noticies > LA SIDRA con Gijón Fabril
Noticies

LA SIDRA con Gijón Fabril

L’escritu de Inaciu Hevia, collaboraor d’avezu de LA SIDRA, y autor d’un escelente trabayu sobro la botella de sidre asturiana, espeya nesti escritu tola solidaridá que compartimos colos trabayaores de Gijón Fabril, y una propuesta concreta: Fai falta una fábrica vidriera asturiana. 

LA SIDRA.- Gijón Fabril nun pieslla!!

Allá pel añu 1915, surdía de les cenices de Gijón Industrial (1900-1913), la nueva “fábrica de vidriería” nomada Gijón Fabril, nel mesmu llugar de La Calzada, en Xixón, onde tuviere asitiada aquella.

Anque conviviere dellos años tovía cola otra vidriera xixonesa de referencia, La Industria (1843-1955), allugada en Begoña, nun yera problema. Había mercáu abondo pa entrambes firmes. La potente industria sidrera asturiana, con llagares necesitaos de botellería bastante, yá tuviere munchu que ver col ñacimientu d’estes vidrieres, y yera ún de los sos principales veceros, demandando tantu el modelu “molde fierro”, el perconocíu popularmente como “botella de xixón”, pa sidra natural, como el modelu axampanao, pa sidra gasificada, qu’esportábase en grandes cantidaes, sobre too pa la boyante colonia d’indianos espardía per Ultramar. Al empar, l’altu nivel teunolóxicu y cualitativu fizo que se fabricaren toa triba d’envases y botelles de vidriu, y obxetos decorativos y d’arte industrial, pal mercáu estatal como tamién pa la esportación.

 

Col pieslle de La Industria, de les pequeñes vidrieres allugaes n’Avilés, y de la villaviciosina de Valle, Ballina y Fernández, llégase a mediaos del s. XX cola factoría de Gijón Fabril llevando tol pesu d’abastecer de botellería a los llagares y xampaneres asturianes, pero nun namás eso, sinón tamién a les cerveceres, fábriques de refrescos, sifones, gaseoses, llicores, agües minerales…. y un llargu etcétera, lo que da idea de la importancia d’esta industria nel mercáu del vidriu güecu.

Murniamente, nel añu 1981, concretamente a les 6 de la tardi del 30 de marzu, apágase el caberu fornu que tovía funcionaba en GF, pol mor d’enguedeyaes estratexes empresariales del grupu SaintGobain-VICASA a onde pertenecía. Esti, paradóxicamente, desvía la producción de botelles “molde fierro”, de mano, a la so fábrica de Burgos (con moldes fechos en Xixón tovía caltriaos con GF), y depués a otres del grupu, como Zaragoza, Vigo, Xerez, etc., llugares toos ellos, como ye sabío, onde nun había mercáu pa esti modelu, d’usu esclusivu pa la sidra n’Asturies, y onde la facíen p’abastecer a los nuesos llagares.

Mentestantu en La Calzada, el personal quedó dedicáu a trabayos de caltenimientu y de venta de los restos que quedaben n’almacén, pasando depués a facer namás los moldes, incluyíu el de sidra “molde fierro”,  pa les otres fábriques del grupu.

Nel mes d’agostu de 1994 treslládense los talleres al polígonu de Porceyo, nes afueres de Xixón, onde SaintGobain véndelo depués a otros amos, anque siguen faciéndose moldes pal grupu.

Como sabemos poles fadies noticies de prensa d’estos díes, la falta de pidíos del anterior propietariu, fai que anguaño caltengan baxo mínimos la fabricación de moldes algo menos de 50 trabayadores, perbién cualificaos, caberu resclavu de la calidá d’esta industria, que por algo lleva resistiendo los envites de toa triba de crisis, demientres más de cien años.

Agora, col actual puxu y diversificación de la industria sidrera asturiana, l’aumentu de produccion de sidra gasificada y de nueva espresión, y la ca vegada mayor demanda de botella nueva nun retornable “molde fierro” pa exportación (pesie a ser tamién exemplu de reutilización caltenible nel mercáu llocal), nun sedría mui aventuráu que resurdiere una pequeña fábrica vidriera n’Asturies. Y equí podía tener munchu que dicir GF.

Ehí tá la idea, y conste que nun ye namás d’ún, que lleva tiempu rondando pela nuesa cabeza, tamién coincidimos con daquién muncho más enteráu, y que tien presentao como tésis de fin de carrera un proyeutu completu de fábrica de vidriu n’Asturies, considerao por otros espertos como vidable. Nun ye poca cosa.

De toes maneres, sea como sea la forma de salvalo, ¡¡¡ GF nun pue pesllase !!!

 

sidre, sidra, sidro, cider, cidre, sagardoa, Apfelwein, Píngguǒ jiǔ, cidro, siideri, seidr, leann úll, Saidā, sider, jablečné víno, jabłecznik, sydr

(Visited 668.299 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies