Inicio > Llagares > La DOP Sidre d’Asturies bate un nuevu récord en 2017, n’aumentando un 14% les sos vientes respeutu a 2016
LlagaresTasties

La DOP Sidre d’Asturies bate un nuevu récord en 2017, n’aumentando un 14% les sos vientes respeutu a 2016

Tamién destaca’l xorrecimientu del 20% nes vientes de sidre natural esplumoso DOP.

LA SIDRA.- Les vientes de DOP Sidre d’Asturies volvieron marcar en 2017 un nuevu récor, al superar nun 14% les del añu anterior. Estai xorrecimientu nun fai otra cosa que demostrar el creciente interés del consumidor pola DOP Sidre d’Asturies. En concretu, en 2017 apurriéronse 2.170.500 contraetiquetes, frente a 1.905.000 apurríes en 2016, lo que supón una medría de 265.000 precintes de garantía (14 %).

La sidre natural esplumoso amparada na denominación d’orixe tamién tuvo un xorrecimientu importante, aumentando les vientes un 20% respeutu al añu anterior. Demientres la campaña de 2017, destináronse un total de 6.926.863 quilos de mazana asturiana a ellaborar sidres amparaes pola denominación d’orixe protexía y los llitros potencialmente certificables so DOP Sidre d’Asturies pa la collecha de 2017 van ser 5.200.000.

La DOP Sidre d’Asturies puede atopase nel mercáu en trés variedaes distintes. Per un llau, ta la sidre natural tradicional y más conocía nel nuesu país; per otru llau la sidre natural de nueva espresión (penerada) que se sirve en copa ensin necesidá de ser echao; y d’últimes la sidre natural esplumoso, qu’hai de sirvise en copa tipo “flauta” pa caltener el carbónicu endóxenu y el saborgu. Esta tercer variedá demuestra que la tradición nun ta reñío cola innovación, algamando que d’un productu tradicional llógrese ún muncho más sofisticáu.

Daniel Ruiz, xerente de la DOP “Sidra d’Asturies” valora estes resultancies:

¿Cómo se sienten con esta espectacular xubida de vientes?
Bien contentos, yá que constitúi un récor hestóricu y una garantía de que la sidre DOP va consolidándose, al tornar algamar un doble díxitu per segundu añu consecutivu (l’añu pasáu les vientes xubieron un 10%). Y la certidume de que’l veceru demanda una mayor calidá. Amuesa d’ello son les cuasique 2.200.000 contraetiquetes d’esti añu.

¿A qué creyi que se debe esti aumentu nel consumu?
Débese a dellos factores. El primeru ye que’l veceru decide apostar por un productu de calidá y saber qué ta consumiendo. De segundes, les aiciones de marketing que van dando los sos frutos. Y finalmente, y non menos importante, la intensa comunicación del Conseyu Regulador. Tou ello constitúiese nun procesu en cadena que xenera estes resultancies tan positives.

¿Cuálos son los retos que se plantegen pal futuru?
De primeres, reforzar l’allugamientu de la marca “Sidre d’Asturies”, que llogra faer menos confusu’l consumu. Esto ye por cuenta de qu’ufierta un Certificáu de calidá y Orixe, basáu en refechos controles, del qu’adolecen otres sidres y qu’asegura l’usu de mazanes 100% asturianes.
Y, per otru llau, siguir un xorrecimientu non yá a nivel del nuesu país sinón abrir a nuevos mercaos a nivel estatal.

(Visited 2.466.043 times)
Compartir
A.M.V.
https://www.lasidra.as
Nacía en Xixón en 1973, fice los estudios de Filoloxía Inglesa nes Universidaes de Uviéu y Bradford (Reinu Xuníu). Trabayé de profesora d'inglés, guía ya intérprete y tradutora. Soi una gran aficionada a la sidre y al bon xintar. Sígueme na ueb www.ciderayalga.com

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies