Inicio > AS > Eventos > International Cider Festival, un referente pa les sidres europees
Eventos

International Cider Festival, un referente pa les sidres europees

RotterdamEl caberu 30 d’abril tuvo llugar na ciudá holandesa de Rotterdam la sigunda edición del Internacional Cider Festival, un eventu qu’axunta a productores de sidre d’estremaes partes d’Europa col envís de da-y puxu al conocimientu d’esta bébora n’Holanda al empar qu’algamar nueos mercaos.

LA SIDRA.- Esti eventu foi entamáu per primer vegá l’añu 2014 por Raúl Henríquez de Ciderwinkel y Wouter Bijl de CiderCider, dos distribuiores holandeses qu’afitaron ésta comu una de les cites referenciales pa les sidres europees. Allugáu nel perbón marcu de la Fenix Food Factory, una remodelada nave industrial nel ária moderna del puertu de Maashaven, esta feria cuntó cola presencia de llagareros de dellos países  y más de milenta presones.

 

Nesta edición LA SIDRA y la Fundación Asturies XXI tuvo l’arguyu de cuntar con una dellegación que representare Asturies nesti eventu. Nelli hebio dos díis, ún a mou de naguración con cena con maridaxe de sidres con platos de xefs holandeses ya un segundu a mou de feria abierta al públicu, onde la xente averóse enllena d’interés a prebar de los destremaos espositores qu’ellí s’afayaben.

Ellí pudiemos topamos con vieyos collacios d’alrodiu Europa que vinieren a participar nel Salón Internacional de les Sidres de Gala (SISGA) y munchos nuevos qu’amosaron braeru interés n’acudir pa la prósima edición. Pente ellos taben los nuesos vecinos de Galicia del llagar Maeloc, presentando les sos sidres mecíes con delles frutes y el formatu botellín, que collechó una perbona acoyía. D’otros países celtes tamién cuntamos cola presencia del llagar escocés Thistly Cross, de la man de Luke Fenton, que mos enseñó la so sidre fermentao en pipes de whiskey, que ya conociéremos d’otros años en Lorient pero que nunca mos dexa indiferentes. Y precisamente de bretaña un llagareru bretón de Cidreries de la Vallée de la Seiche, de la rexón de Rennes, ufiertándomos unes sidres brut y perees de la más alta calidá, caberamente premiaes en París.

Tamién tuviemos a la sidre irlandesa Finnbarra, conocíos nuesos de la feria alemana del Apfelwein Weltweit, y Géraldine púnxomos al corriente de les sos caberes sidres de 15 º, tou un descubrimientu que fizo les delicies de los amantes de los saborgos más fuertes, xuntu con otres tribes de sidre que-yos son propies.

De la otra fastera d’Europa, de Letonia atopemos les sidres del llagar Abavas, y de man del propiu llagareru Mārtiņs Barkāns conocimos les postreres sidres qu’esti llagar desendolcare: una sidre con un tastu propiu ya únicu que lu fae un referente nel so país.

La sidre asturiana viose representada con variedaes asgaya de sidre natural, que trunfó pola nuesa antigua y vistosa cultura del echáu, pol frescor de la sidre natural y pola alta calidá de les nueses sidres esplumoses. Riestra, Trabanco, Viuda d’Angelón y Panizales aseguraben una bona variedá de sidres, afayaes a los destremaos gustos del interesáu públicu de Rotterdam.

Pero bramente les sorpreses diéronles los propios llagares holandeses, especialmente Welsums Goed y De Vergeten Appel, que mos ufiertaron unes sidres modernes, de saborgos enforma asemeyaos a les sidres asturianes, pero con un calter propiu inequívocu ya innovaores a la vegá, pues cunten con una variedá de sidre con flores de xabú con un arume inconfundible, al empar que delles sidres brut que darán munchu de que falar.

Asina, los holandeses tienen el méritu duple d’entamar esti eventu, y per parte de los llagareros, d’afitar al empar qu’asitiar qu’asitia dichu país nel panorama sidreru internacional.

(Visited 2.466.607 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies