Inicio > AS > Noticies > III Axuntábense de la Bona Confradería de los Siceratores d’Asturies
Noticies

III Axuntábense de la Bona Confradería de los Siceratores d’Asturies

siceratores1L’actu tuvo llugar nel Muséu la Sidre en Nava y nelli proclamáronse los nuevos confrades de númberu y méritu.

LA SIDRA.- Ye en San Xosé cuandu, sigún marca la tradición, los llagareros escomencipien a corchar la sidre. Y qué meyor díi pa que la Bona Confradería de los Siceratores d’Asturies cellebrara’l so III Axuntábense en compaña de les otres hermandaes gastronómiques asturianes. L’eventu entamó a les cincu la tardi nel Muséu la Sidre. L’actu tuvo presidíu pol Roberto Llamedo, maestre sicerator y comu presentador, Milio’l del Nido. La gala escomenzó col Coru de la Tertulia Errante qu’interpretó’l cantar Axuntábense y l’hinu de la Confradería.

 

Darréu nomáronse los cinco siceratores de méritu y ún de númberu. Esti postreru foi Ángel García Oteru, quien foi fundador y presidente del grupu de colleicionismu d’etiquetes Sidrestur, autor del Catálogu d’Etiquetes, y collaboraor de la revista LA SIDRA. “Ye capaz de facer cualisquier cosa por consiguir una etiqueta, fasta facese confrade, y güei llega-y el turnu de xurar comu nuevu sicertaror” dixo Milio y darréu Llamedo tomó-y el citáu xuramentu de la Confradería centráu nel apreciu, respetu y espardimientu de la nuesa bébora por escelencia.

De siguío proclamáronse los confrades de méritu, presones del universu sidreru que según manifestó Milio: “Toos trabayaron y trabayen por contribuyir a la cultura de la sidre na so más amplia espresión, bien comu llagareros, echaores, prebadores, dibuxantes y divulgadores”.

Los nuevos siceratores son: l’illustrador Antonio Garrido, dibuxante dende 1961 y reconocíu ente les sos munches obres, por ser l’autor del cartelu ¿Qué tien esta sidre? “Enxamás nun cobró un duru polos drechos d’esi diseñu, pero lo que realmente-y cafia ye velu puestu con una firma que nun seya la suya” siñaló’l presentador.

El siguiente nomamientu foi pal prebador Gumersindo Martínez, miembru del Comité de Tasta de la marca “Sidre de Mazana Escoyía”. Darréu reconocióse’l llabor de los llagareros Juan y Fernando de Sidre Roza, tercer xeneración nel oficiu y ganadores d’un ensame concursos. Sonia Fidalgo foi la cuarta confrade de méritu. Periodista, presentadora y divulgadora de la cultura asturiana y por supuestu de la sidre, dixo sentise bien emocionada por esti premiu a la so trayeutoria. Y finalmente el quintu nomamientu foi pal echaor Jorge Vargas, ganaor del campionatu d’echaores de sidre. Sicasí, por cuestiones de trabayu nun pudo llegar a recoyer la reconocencia, anque sí llegó más tardi con otru de los meyores echaores de Asturies, Salvador Ondó.

Al rematar los nomamientos xubieron a la tribuna l’alcalde de Nava Juan Cañal y el profesor d’Hestoria y especialista en cultura sidrera Luis Benito. Cañal anunció que la Fundación de la Sidre ta analizando la posibilidá de visitar los llagares de la zona como parte de la ufierta del muséu. Pela so parte, Benitu tornó a sorrayar la necesidá de qu’esti equipamientu conviértase realmente nun cientru d’investigación pa la cultura sidrera, entá ye más si ta lluchándose por que la cultura asturiana de la sidre se convierta en Padrimoniu de la Humanidá pola UNESCO.

Pa terminar l’actu, los nuevos confrades pudieron corchar una botella nuna pipa dispuesta na tribuna con esi envís. Al salir toos del Muséu de la Sidre, la semeyaa de familia nun podía faltar. Asina que los miembros de les confraderíes gastronómiques d’Asturies posaron so la talla asturiana espuesta nel emblemáticu muséu. Comu nun podía ser d’otra miente’l broche d’oru foi una espicha entamada pa los asistentes nel Llagar de Lolina onde la Sidre Roza foi, comu non, la protagonista.

(Visited 2.466.471 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies