Inicio > AS > Eventos > II Fiesta de la Mayada y la Sidre dulce
Eventos

II Fiesta de la Mayada y la Sidre dulce

Del 11 al 13 payares, Noreña cellebrará la segunda edición de la Fiesta de la Mayada y la Sidre dulce, un eventu sidreru pioneru.

LA SIDRA.- La fiesta entámenla a comuña l’Asociación Cultural InfoNoreña y la Banda Gaites de Noreña, cuntando cola collaboración del Conceyu de Noreña y de LA SIDRA. 

DeMpués del ésitu de la primer edición, búscase nesta segunda afitar l’eventu con un programa más completu al que se-y amesten dalgunes novedaes interesantes. Una primer novedá ye’l llugar de celebración, esti añu va preparase la Sala Polivalente “La Plaza”, que ye l’antigua plaza d’abastos, pa convertise en Llagarón.

Tamién como novedá ta la de la inclusión d’un pregoneru. El profesor universitariu David M. Rivas, autor de llibros como “La sidra asturiana. Bebida, ritual y símbolo” o “Las fiestas asturianas. Nuevas formas viejos ritos”, encargaráse de dar el pregón p’abrir la fiesta.

Nel ámbitu los concursos, esti añu al II Concursu de Dulce de Mazana, va xuntase ún de sidre casero, col oxetivu de da-y puxu a la tradición d’ellaborar pa en casa. Asina mesmo habrá un Concursu d’Echaores, puntuable pal Campionatu Oficial d’Asturies. Tamién, dientru la Esfoyaza Popular, que ye novedá esti añu, va entamase el I Abiertu de Riestraores.

Tamién s’animen esti añu les nueches. Tanto el vienres como’l sábadu pel escenariu pasarán varies actuaciones. El vienres sedrá el grupu Tuenda, tríu referente de la música tradicional asturiana compuestu por Elías García, Pepín de Muñalén y Xosé Antón “Ambás”. El sábadu sedrá’l momento del afamáu Rodrigo Cuevas. Nun acaben les actuaciones equí, igual que l’añu pasáu, el domingu al mediu día la protagonista sedrá la Banda Gaites de Noreña.

Amás de les novedaes tornará haber prebes de sidres ganadores nel Salón Internacional de les Sidres de Gala, los talleres infantiles “Xugando na Cocina”, mayadona ininterrumpida nel llagarón que se va instalar y nos llagarinos pa los neños, amagüestos, sidre’l duernu,…

Por si fuera poco, esa fin de selmana y dientro la programación, cellébrense les II Xornaes Gastronómiques de la Sidra y la Mazana en sidreríes y restoranes noreñeses collaboradores, onde se podrán degustar bien de platos con estos productos y los sos derivaos.

(Visited 667.686 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies