Inicio > AS > Espublizaciones > Especial Sidre d’Asturies DOP
Espublizaciones

Especial Sidre d’Asturies DOP

Esti mes de xunetu, acompangando a la revista del mes, LA SIDRA espublizó un especial dedicáu íntegru a la Sidre d’Asturies DOP, con entrevista al so presidente, Celestino Cortina, información del Salón de la Sidre d’Asturies, races de mazana, chigreros auténticos, sidreríes d’Asturies. Imprescindible.

LA SIDRA.- Ye la primer vegada nos nuesos catorce años d’esistencia que LA SIDRA edita un especial monográficu, y facémoslo cola meyor de les motivaciones, darréu que demientres la presentación de la collecha 2016 de la Sidre d’Asturies DOP comunicóse la tan naguada integración de los llagares que fasta agora formaben parte de la marca de calidá Sidre d’Escoyeta, consiguiéndose una xunidá hestórica que marcará un enantes y un dempués nel seutor sidreru asturianu.

Nos tiempos caberos los cambios na Sidre d’Asturies foron perimportantes, tanto en formes como en conteníos, y lo que ye meyor, foron peracertaos, corrixendo erros iniciales y faciendo propuestes nueves coles que foi ganando una credibilidá y una reconocencia que permitió la progresible incorporación de llagares que nun entamu nun veíen esa necesidá o que, como nel casu de la Sidre d’Escoyeta, apostaren pola so propia marca de calidá al marxe de la DOP.

 

Tan faciéndose les coses bien y los resultaos nótense. Ye cierto que los retos son munchos, pero les perspeutives son bones, especialmente agora que la xunidá ye un fechu. Queden por incluyir na DOP les más de 2.000 races de mazana asturiana inxustamente marxinaes; por reconocer les pumaraes de piqueñes dimensiones -esto ye Asturies y el minifundiu una rialidá- por ganar credibilidá como marca asturiana, atalantando la defensa de l’asturianía non solo en progüeyu propiu, sinon como interés xeneral, normalizar l’usu de la llingua asturiana y proceder al etiquetaxe na nuesa llingua, o en billingüe si se quier; hai d’avanzar na calidá, na reconocencia de nueves tribes de sidre, na internacionalización, na esportación; y sobro too n’algamar que los asturianos la reconozamos como símbolu, que sepamos ver nella la defensa de los nuesos agricultores, del nuesu mediu rural, de la nuesa cultura ya identidá, y que como siempres fexemos, seyamos los meyores embaxaores de la sidre, de la sidre d’Asturies, ellaborada polos nuesos llagareros con mazanes del país.

(Visited 2.468.083 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies