Inicio > Eventos > Espalma la sidre preslla con 4.000 llitros vendíos
EventosLlagares

Espalma la sidre preslla con 4.000 llitros vendíos

Foi la primer folixa del nuesu productu por escelencia cellebrada en La Pola Siero

LA SIDRA.- Tres dos díis de cellebración na Plaza Cubierta de La Pola Siero, “Espalma la sidre” preslló les sos puertes el domingu con 4.000 llitros de sidre vendíos. Na folixa ufiertábase, amás de sidre natural, DOP y BIO, auguardientes, llicores y derivaos de la mazana. Amás,pa toos aquellos que nun pudieren o nun quinxeren beber alcol, teníen la posibilidá d’alquirir augua mineral. Esta ye la primer aición que, producía pola empresa llocal Alyan Eventos, rialicen los Llagares de Siero tres presentar la so nueva marca na que se xuncen pa facer valir el productu del conceyu. N’Espalma la sidre participaron Fanjul, Fonciello, Muñiz, Casería San Juan del Obispo, Arbesú, Fran, Quelo, La Morena y Viuda de Palacio.

Estos llagares avalen y cellebren la gran acoyía que tuvo la primer edición y yá echen el güeyu a la prósima. Esti foi un festival que tenía l’oxetivu de concenxar sobro’l valor que posee’l nuesu productu estrella, facer finapié nel so bon serviciu y llegar a un nuevu públicu.

“Damos por fináu’l festival superando l’oxetivu, tres el pasu pela Plaza d’Abastos d’unes 6.000 presones, que captaron el mensaxe a la perfeición y supieron valorar la sidre del conceyu. La mayor afluyencia de públicu alvirtióse na nuechi del sábadu y la sesión vermú del domingu, hores nes que la Plaza Cubierta tuvo atarraquitada” siñalaron dende Alyan Eventos.

Demientres les dos sesiones vermú, la bandina Los Gascones punxo la nota musical y animó a un públicu entregáu, mentes que demientres la nuevhi del sábadu los protagonistes fueron el grupu “La Versión de los Hechos” y el DJ polesu “Diego Laruelo”. Tamién collaboraron la Casa Conceyu Siero, Caja Rural d’Asturies, Agua Fuensanta y COEM Astur. “Teniendo en cuenta les coses a meyorar, prevé cellebrase la prósima edición perfeicionada pero calteniendo’l gran ambiente que carauterizó esta primer folixa” conclúin los entamaores.

(Visited 620.146 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies