Inicio > Cultura sidrera > Entrega premios del XII Concursu Semeyes LA SIDRA
Cultura sidreraEventosImaxe

Entrega premios del XII Concursu Semeyes LA SIDRA

  • Al actu asistirá’l conceyal de Turismu, Esportes, Festexos y Mocedá de Xixón, Jesús Martínez Salvador, y el presidente de la Federación Asturiana d’Asociaciones Fotográfiques, Luis José Vigil-Escalera
  • Participaron más de 300 semeyes procedentes de 25 países, el concursu ta avaláu pola Confederación Española de Fotografía y el primer llugar recayó en “La sidra y la manzana”, d’Adolfo Loyola, d’Arxentina
  • Editaráse una etiqueta comemorativa que s’entregará a los asistentes

LA SIDRA.- El prósimu sábadu 2 defebreru a les 20:00 hores tendrá llugar en La Galana de Xixón (Plaza Mayor, 10) la entrega premios del XII Concursu Semeyes LA SIDRA. Certame entamáu pola revista LA SIDRA y l’Asociación Asemeyando; y qu’amás cunta col padrociniu del llagar JR y col sofitu de la citada sidrería. Participará na entrega premios el conceyal de Turismu, Esportes, Festexos y Mocedá de Xixón, Jesús Martínez Salvador; tamién el presidente de la Federación Asturiana d’Asociaciones Fotográfiques, Luis José Vigil-Escalera; y la secretaría y l’encargáu de les Bienales de Fotografía, Marta Menéndez y Pedro Gutiérrez.

El pasáu 28 xineru féxose públicu’l fallu del xuráu. El primer premiu foi pa la semeya “La sidra y la manzana” d’Adolfo Loyola procedente d’Arxentina. El primer accésit recayó n’Arturo Rodríguez Ortiz, d’España, que participó con “El nadador”. El segundu accésit foi pa “Pomum Tributum 1”, tamién d’España y rializada por Antonio Farto Casado. Finalmente, el premiu especial qu’otorga’l llagar JR foi pal asturianu Óscar Chamorro Flórez y la so istantánia “Bodegón”.

El primer premiu ta dotáu con 700 euros y medalla d’oru de la CEF. El primer accésit con 200 euros y medalla plata de la CEF; el segundu accésit con 100 euros medalla bronce de la CEF; y al ganaor del premiu JR entregaránse-y dos caxes de sidre del llagar. En casu de que dalgún o dalgunos de los premiaos nun puedan acudir a la entrega, recoyeránse los premios na so representación y fadráse-yos llegar.

Asina mesmo, nel actu d’entrega premios entregaráse una etiqueta comemorativa que s’entregará a los asistentes al actu.

Nesta XII edición del Concursu Semeyes LA SIDRA participaron 92 autores de 25 países estremaos. En total presentáronse 310 semeyes. La entrega premios tamién sedrá l’escenariu pa la naguración de la esposición del Concursu Semeyes LA SIDRA que tará compuesta poles meyores 20 obres presentaes al certame. Nun primer momentu podrá visitase na sidrería La Galana, darréu treslladaráse a otros establecimientos yá que l’amuesa sedrá itinerante.

El Concursu Semeyes LA SIDRA ye’l certame fotográficu más antiguu de los que tienen la bébora emblemática asturiana como temática principal. Amás ye de los pocos d’esta triba certames nel que nun se cobra a los fotógrafos por entrar a participar.

 

 

 

(Visited 638.184 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies