Inicio > Llagares > Entrega premios a les meyores sidres d’Asturies DOP
Llagares

Entrega premios a les meyores sidres d’Asturies DOP

Val de Boides, Pomarina y Solaya fueron les marques premiaes nes categoríes meyor sidre natural, meyor sidre calistrao y meyor sidre esplumoso, respeutivamente; amás Pilar Coque foi nomada pumarera del añu

La Casa de los Hevia en Villaviciosa foi’l marcu nel que se desendolcó la entrega de premios a les meyores sidres acoyíes a la Denominación d’Orixe Protexía. Un actu que se caltuvo pesia les llimitaciones xeneraes pola COVID-19. Hai de mentar que n’ediciones anteriores, esta entrega de gallardones formaba parte del llamáu Salón de la Sidre d’Asturies’, un alcuentru qu’apiguraba estremaes actividaes como degustación, harmonizaxes, tasties guiaes ya inclusive espectáculos musicales o de maxa.

Esti añu los ganaores fueron: Val de Boides del Llagar Castañón en Villaviciosa como Meyor Sidre Natural Tradicional. Pomarina de Valle, Ballina y Fernández tamién de Villaviciosa, como Meyor Sidre Natural Calistrao. Y Solaya, del Llagar de Quelo en Tiñana, como Meyor Sidre Natural Esplumosa.

“Esti premiu ye de verdá a la meyor sidre d’Asturies, porque ta ellaborao con mazana 100% d’esta tierra. Con Val de Boides toi llogrando enforma premios y toi bien arguyosu del trabayu de tol’ equipu del llagar. Vemos que la nuesa sidre ta siempres nun perbon nivel y que se caltién. Esto demuestra que vamos per bon camín y que caltenemos la calidá” dixo a esti mediu de comunicación, Julián Castañón.

Pela so parte, Tano Collada, enólogu de Valle, Ballina y Fernández, desplicó sobro Pomarina que ye una sidra “fresco y fácil de beber”. “Ye un productu que tien cuasique toles carauterístiques que pue tener una d’echar, pero que puede sirvise en copa ensin necesidá d’echalo”, dixo.

Alberto Fanjul, del llagar de Quelo eesplicó de Solaya: “Intentamos faer les coses bien y esti premiu diomos muncha allegría. Ye una sidre natural, fresco, con notes afrutaes que la faen más reonda. La so borbolla ye bien fina. Ye una sidre artesanal, ellaborao por aciu segunda formientadura en botella siguiendo’l métodu champanoise polo que lleva trabayu, trabayu y trabayu”.

Finalmente Pilar Coque dixo sentise bien honrada por ser reconocía como meyor pumarera del añu. “El trabayu nel campu, seya de la mazana o de lo que seya, ye bien duru. Si tenemos sofitu sálse alantre y si non ye perdifícil. Pero somos bien aportunantes, ponemos enforma enfotu, muncha illusión y por eso llegamos a consiguir grandes coses” manifestó.


(Visited 2.464.622 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies