Inicio > Opinión > Entamu LA SIDRA 205 (Mayu’21)
Opinión

Entamu LA SIDRA 205 (Mayu’21)

Entamu

Namás declarase’l fin del Estáu d’Allarma tol seutor de la sidre escomienza a remanecer con mayor fuerza que nunca. Dempués de tantu tiempu de restriciones y de dimposiciones sanitaries nes que nun se sabe si prevalecieron más los intereses políticos o los puramente sanitarios, y que tantu perxudicaron al seutor, lo cierto ye que la paulatina normalización de la vida social ta desencadenando un auténticu espolletar del panorama sidreru.

Salen al mercáu nueves sidres sobro la madre; la DOP Sidre d’Asturies sigue cola so efervescente actividá, nagura una tienda on-line pa los productos acoyíos a esta marca de calidá, y sospriende gratamente al consiguir que la hostelería de Tazones la tome comu principal referencia. Per otra parte ta teniendo llugar el Concursu del Meyor Cachopu d’España, y tamién el de la Meyor Fabada de Mundiu, prevénse recuperar les fiestes de prau, confírmase la cellebración del que va ser el XI Salón Internacional de les Sidres de Gala… y espérense munches más novedaes, tantu per parte de los llagares como de les sidreríes, que tán superando esta llarga fase de lletargu obligáu y plantegando toa triba d’iniciatives pa esfrute de los sos veceros.

Non menos importante resulta l’aprobación por unanimidá pol plenu de la Xunta Xeneral de la moción presentada por Adrián Pumares –FORO Asturias-, pa que’l Gobiernu del “Principado” dea al seutor de la sidre y la mazana la importancia que bramente merez dao la so importancia cultural y el so impautu económicu, con propuestes clares que pasen per un Plan Estratéxicu pa la Mazana y la Sidre, polítiques p’absorver la nueva collecha de mazana y la imprescindible ufierta formativa.

N’otru orde de coses, la Fundación Asturies XXI crió, en collaboración col Muséu del Pueblu d’Asturies, un depósitu museísticu sidreru, y nel Muséu de la Sidre de Nava paez que se mueven les coses, talo como nos allantra’l so nueu direutor na entrevista qu’espublizamos nesti númberu de LA SIDRA.

Avérense bonos tiempos, disfrutémoslos como merecen. ¡Toma un culín!!

VER REVISTA

BAXAR PDF


(Visited 2.466.030 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies