Inicio > Opinión > Entamu LA SIDRA de Xunu’22 (Nb. 218)
Opinión

Entamu LA SIDRA de Xunu’22 (Nb. 218)

Entamu

Escomenzó con fuercia esti mes de xunu de remontada

La Preba de Gascona recuperóse, cumpliendo abondo cola meyor de les espeutatives nuna dinámica ascendente, qu’ensin dulda va llevar a nueves formes y propuestes pa faer frente al ca vegada mayor puxu d’esti eventu referencial del panorama sidreru asturianu.

Per otra parte, el Salón de la DOP Sidre d’Asturies repúnxose con fuercia nuna xornada na que los 33 llagares acoyíos a esta marca de calidá ufiertaron una preba de la collecha 2021 de la so sidre, nun eventu perbién planiáu, espaciosu y pa ná masificáu, que permitió que los asistentes pudieren esfrutar d’esta oportunidá única d’aceder a toles sidres asturianes con DOP. De xacíu, la revista LA SIDRA tamién participó nesti eventu, al que dedicamos un ampliu reportaxe nel presente númberu.

Pero hai muncho más. Empecipien yá a cellebrase los primeros concursos y degustaciones de sidre casero, esponente del rixu de la cultura asturiana de la sidre; anúnciense nuevos eventos sidreros, como la III Xornada de la Sidre en Carbayín; y yá pal mes que vien, el Festival de la Sidre de Nava, el festival de los festivales sidreros, que vien marcando enclín dende’l so entamu, y qu’esti añu va algamar la so 45 edición.

Son momentos de remontada dempués del andanciu, y adulces sidreríes y merenderos van recuperando’l so dinamismu perdíu, por más que la situación económica actual, la inflación, el preciu la enerxía y la inestabilidá llaboral tean llastrando lo que tuviera de ser un repique en toa riegla.

Per otra parte, siguimos abasnando vieyos problemes, como la falta d’un Plan Estratéxicu pa la Sidre y la Mazana, la falta d’inclusión de les sidreríes como parte integrante del seutor sidreru y agora mesmo, la falta d’echaores profesionales, qu’entá nun cunten con formación rieglada nin reconocencia como categoría llaboral específica.

En tou casu, la sidre vuelve tar na cai con ganes y fuercia, y como ye bien sabío ‘mentes hai sidre, hai esperanza’.


(Visited 2.466.467 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies