Inicio > Opinión > Entamu LA SIDRA de Xunetu (Nb, 196)
Opinión

Entamu LA SIDRA de Xunetu (Nb, 196)

Entamu

La nueva normalidá sidrera ta resultando más difícil de lo que se camentaríe. A los problemes económicos y les llimitaciones y dificultaes que ta suponiendo l’afayamientu a les dimposiciones sanitaries, hai que’amestar un xorrecimientu del riesgu pa los profesionales de la hostelería que nestos díis de branu atienden a un turismu proviniente de rexones con una alta incidencia del coronavirus.

Per otra parte, la sensación de provisionalidá xenerada pola insistencia nos posibles rebrotos, por más que la situación asturiana seya afortunadamente privilexada fasta la fecha, y el repitíu anunciu d’una nueva folada del andanciu acullá pa setiembre-ochobre, cria una situación qu’en ná aida a la normalización social, y fai entá más meritoriu’l papel del conxuntu del seutor sidreru, dende los pumareros a los chigreros. Si a ello amestamos la falta de sofitu istitucional, el comportamientu del seutor algama niveles d’heroismu. ¡Qué diferencia ente los 50 millones de € colos que’l gobiernu vascu sovencionó a los sos llagareros pa paliar los efeutos del coronavirus y l’ausencia de cualisquier sofitu económicu a los sos homólogos asturianos per parte del “Principado”!

Y ye equí onde hai que destacar la fuercia del seutor, cómo se reinventó nestes difíciles situaciones, el so apueste pola vienta online de sidre, l’afayamientu de los chigres, los inxenios p’aumentar la efectividá sanitaria y prevenir los posibles contaxos… espresiones de la voluntá yá non solo de ser, sinón de siguir siendo, másima espresión d’identidá y vitalidá.

Y nesti siguir siendo nun podemos sinón destacar la cellebración alternativa del Festival de la Sidre de Nava, que se negó a dexase vencer pol andanciu, y buscó formes propies y orixinales d’espresase; el “Axuntábense” de la Bona Confradería de los Siceratores, que cellebraron estremando precuros, pero con ésitu o; la mesma DOP Sidre d’Asturies, que nos postreros meses ta desendolcando una actividá incesante, na que destaca tanto la cantidá d’iniciatives desenvueltes como’l caláu de les mesmes, social y profesionalmente.

Esi dinamismu ye la nuesa garantía de futuru y lo que costitúi anguañu la nuesa esperanza.

 


(Visited 2.465.971 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies