Inicio > Opinión > Entamu LA SIDRA de Setiembre de 2022 (Nb.221)
Opinión

Entamu LA SIDRA de Setiembre de 2022 (Nb.221)

Entamu

Escepcional, esti mes ta siendo –en términos sidreros- escepcional, con una enorme cantidá d’eventos nos que la sidre ye la protagonista principal y una infinidá nos que ye compaña obligatoria.

Destacar la Fiesta de la Sidre de Xixón, pero tamién la de Villaviciosa, llueu Xixón de Sidre y, l’eventu que fai de Xixón la capital mundial de la sidre, el Salón Internacional de les Sidres de Gala (SISGA), y de xacíu los concursos de sidre casero, un auténticu fenómenu social que va a más y que costitúi toa una espresión de la vitalidá de la cultura sidrera asturiana.

Nun se trata namás de que ca vegada hebia más concursos de sidre casero, nin que ca vegada seya mayor el númberu participantes, ye que se deteuta un interés y un siguimientu perimportante d’estos eventos, que queda reflexáu nel so altu poder de convocatoria popular. Per otra parte tamién se repara cómo xunta los llagareros de tola vida, van apaeciendo llagareros más nuevos; llagareros y llagareres, y esti ye un fenómenu a destacar.

Los concursos de sidre casero son una auténtica esperiencia na que podemos recordar vieyos saborgos y atopar otros nuevos, precisamente n’unos momentos nos que la sidre industrial ca vuelta ye más homoxénio y estandarizao. Sí ye cierto que s’echa de menos nestos concursos una mayor variedá. ¿Qué pasa cola sidre d’espolleta, una modalidá de sidre tradicional que por dalgún motivu nun se tien en consideranza? ¿y de les nueves sidres? La cultura asturiana de la sidre tien puxanza abondo pa caltener les formes tradicionales y al empar desendolcar formes nueves. Nun hai qu’autollimitarse.

D’otra miente, siguimos cola esmolición de ver qu’esti añu hai poca mazana. De nueu la vecería, qu’incomprensiblemente nun s’acaba solucionar. La vecería y l’ausencia planificación, y más concretamente d’un Plan Estratéxicu pa la Sidre y la Mazana. Nun podemos siguir col descontrol esistente, orixe d’arbitrariedaes y de redes clientelares. Precisamos saber cuánta mazana consumimos, cuánta producimos, ver cuala ye la diferencia, y planiar una estratexa que mos lleve al autoabastecimientu. Ye urxente.


(Visited 2.467.330 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies