Inicio > Opinión > Entamu LA SIDRA de Mayu (Nb. 241)
Opinión

Entamu LA SIDRA de Mayu (Nb. 241)

Entamu

El mundiu la sidre avanza de forma espectacular nestos meses de primavera, de tala miente que los eventos que tienen a la sidre como principal protagonista multiplíquense fasta’l puntu de faer difícil cumplir con toos ellos que, qu’amás, munches vegaes coinciden nel tiempu.

Otru tantu asocede cola actividá nes sidreríes y merenderos. Conforme los díes fáense más llargos y les temperatures más prestoses, l’arribación a los mesmos dispárase y l’ambiente tórnase ca vuelta más festivu.
La sidre remanez de nueu y espándese de forma notable ¡y ainda ta empecipiando la temporada de les fiestes de prau!!

Na actualidá d’esti mes hai que destacar ensin dubia la presentación del proyeutu européu CIDEREU, llideráu pola Fundación Asturies XXI col placet del Ayuntamientu Xixón, y que fixo hestoria al consiguir presentar énte la Comisión Europea una propuesta qu’implica a ocho ciudaes distintes –trés d’elles asturianes- de cinco estaos de la Xunión Europea. Trátase d’una iniciativa pionera, ensin precedentes, na que de magar la mazana y la sidre como nesos de xunión revaloricen y reivindíquense esos productos y les ciudaes participantes, dientru’l marcu européu.

Lliderar asemeyada propuesta constitúi tou un ésitu, venceyar a les ciudaes y ellaborar un programa d’actividaes pa dos años, una auténtica heroicidá y; si finalmente consigue ser aprobáu na Xunión Europea, vamos poder falar d’un enantes y un dempués nel panorama sidreru asturianu y européu.

Na parte negativa, materialízase la discriminación del Muséu del Pueblu d’Asturies a la Primer Sidre L’Añu, darréu que, tres refugar la so cellebración con argumentaciones espúries, permitió la cellebración nes sos instalaciones d’un eventu asemeyáu, el LEV Festival, nel que, eso sí, consumíase cerveza en cuentes de sidre. Llamentable.

N’otru orde de coses, esmolez nos ambientes sidreros la forma na que la temporada turística –que s’anuncia entá más masificada de lo avezao- va influyir nel consumu de sidre. Ca vegada son más les sidreríes qu’abandonen la barra, y que cola llegada del branu conviértense prácticamente en ‘cases de comíes’, siendo cuasique imposible tomar una botella sidre.

Son esmoliciones llóxiques que va haber que ver cómo van evolucionando; en tou casu, tamos nun momentu estupendu pa la sidre, ¡esfrutémosla!

 

Pa recibir el PDF de la revista fai falta tar dáu/da d’alta nel whatsapp de LA SIDRA ¡Gratis!

(Visited 2.661.622 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies