Inicio > Opinión > Entamu LA SIDRA d’Abril’22 (Nb.216)
Opinión

Entamu LA SIDRA d’Abril’22 (Nb.216)

Entamu

La esitosa cellebración de la XII Primer Sidre L’Añu –PSLA-, marca un entamu de temporada sidrera con unes estupendes perspeutives, qu’esperamos veanse confirmaes.

La importante afluyencia y participación na PSLA d’esti añu, y la calidá de les sidres que nella pudieron tastiase -con Sidra Roza, como sidre oficial tres algamar la distinción de Meyor Primer Sidre L’Añu’22- anuncia una temporada sidrera escepcional, na qu’el bon productu amiéstase a les ganes de recuperar el tiempu perdíu tres l’agotaor andanciu que venimos careciendo.

Foron cuatro xornaes d’espicha inescaecibles, onde se potenció un consumu sanu y responsable de la nuesa bébora, onde la cultura asturiana de la sidra espresóse en toles sos manifestaciones, y onde la vitalidá y tresversalidá de la mesma quedó de manifiestu, con participación ya implicación d’amantes de la sidre de toles edaes.
Per otra parte, y como feliz consecuencia de la iniciativa de recuperar la primer sidre del añu como productu diferenciáu -una sidre nuevo que llegara a esapaecer del mercáu pola industrialización de los llagares- esti añu aumenta nuevamente’l númberu llagares que ponen a dimposición del públicu la so primer sidre del añu, llámenla sidre sobro la madre, sidra nuevo, sidra de primavera…

Y esto ye solo l’empiezu, prósimamente los llagareros de sidre casero van rializar el so primer alcuentru, van apurrise los premios del Concursu Semeyes LA SIDRA y va nagurase la esposición coles semeyes ganadores, va haber presencia de la DOP Sidre d’Asturies en Madrid Gourmet, va cellebrase ‘La mar de sidre d’Asturies’, y yá pa xunu presentaráse’l Salón de la Sidre d’Asturies DOP… por citar dellos de los eventos más inmediatos.

Bramente nun podemos ignorar que dos años d’andanciu perxudicaron de forma notable’l seutor: pumareros, llagares, sidreríes… que la recuperación del tiempu perdíu va ser difícil y en dalgún casu imposible; amás la coxuntura internacional nun ye precisamente falaguera, pero lo cierto ye qu’hai ganes de salir d’esti bache y, de verdá, esti añu la sidre ta especialmente bona.

 

(Visited 2.465.437 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies