Inicio > Opinión > Entamu LA SIDRA 182 (Febreru’19)
Opinión

Entamu LA SIDRA 182 (Febreru’19)

Entamu

La rempuesta de los acabante nomar embaxaores de la candidatura de la cultura sidrera asturiana como Padremuñu Inmaterial de la Humanidá pola Unesco, y de la sociedá asturiana en xeneral, superó cualisquier previsión cuantitativa y cualitativamente; y fai a tolos asturianos y asturianes protagonistes indiscutibles de lo que ye un proyeutu motivador ya illusionante.

Sicasí, hai de ser conscientes de que mos enfrentamos a un procesu de duración indeterminao, que nel meyor de los casos -ello ye, que’l “Principado” llegue a presentar la candidatura- va riquir d’una firme defensa y sofitu políticu, darréu que nel llargu periodu d’incumplimientos y retrasos na presentación d’esta candidatura adelantráronsemos cientos de propuestes, y endureciéronse de forma bien significativo los requisitos a cumplir.

Y ye ende onde pueden surdir les flaqueces del proyeutu, porque’l sofitu popular, por más impresionante que tea siendo, resulta bien abegosu de caltener si nun se concreta un horizonte temporal, y si nun esiste una planificación y un programa nidiamente estructuráu. La bona voluntá por sigo sola tien un algame llimitáu; ye l’Alministración la que tien de lliderar esti procesu en tolos frentes, si lo que rialmente se quier ye consiguir l’oxetivu.

Por eso, que lo presente un gobiernu al que-y queden apenes dos meses per delantre con unes perpeutives polítiques p’Asturies inciertes, xenera cierta esmolición. El nuevu gobiernu que sala de les urnes a finales de mayu va tener una gran responsabilidá: nun defraudar les espeutatives de tola sociedá asturiana y comprometese fírmemente cola candidatura.

N’otru orde de coses, hai de solliñar el destacáu protagonismu de la sidre asturiano en FITUR, un auténticu exemplu de lo que tuviera de ser la so presencia n’eventos asemeyaos, como tamién –a otru nivel- ta asocediendo con SALENOR. Asina mesmo, la entrega premios del Concursu Semeyes LA SIDRA nesta la so décimosegunda edición, supunxo toa una esibición de la potencialidá ya internacionalización de la nuesa cultura sidrera; y otru tantu pue dicise de les Xornaes de la Sidre en Ribeseya, un auténticu focu d’afondamientu y espardimientu de la cultura asturiana de la sidre.

D’otra miente, la sidre sigue avanzando nos llagares, y aína vamos poder cuntar coles primeres sidres, de les que poder esfrutar como se merecen na Primer Sidre l’Añu, que como ye avezao cellebraráse en Xixón, en Selmana Santa.

 

(Visited 2.464.382 times)
Compartir

2 thoughts on “Entamu LA SIDRA 182 (Febreru’19)

Comments are closed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies