Inicio > Opinión > Entamu LA SIDRA 170
Opinión

Entamu LA SIDRA 170

Entamu

Tiempu d’espera pa la sidre, agüeyando yá la Primer Sidre l’Añu a cellebrar en Selmana Santa, y apaecen de nueu los primeros discutinios alredior del preciu la sidre, nos que se repiten les avezaes argumentaciones al respective de los marxes económicos que dexa’l productu a llagares y chigres.

Un alderique onde podemos oyer qu’hai más marxe n’una botella d’augua que n’una de sidre, pero resálvase que naide nun entra a una sidrería a tomar augua; o que si aumentara primero la calidá podríe llueu repercutise nel preciu. En tou casu esti repitíu discutiniu resulta estéril por demás, darréu qu’ufierta una rempuesta simplaya a lo que ye un problema estructural del seutor.

Lo cierto ye que la perda de rentabilidá del seutor sidreru nun depende tantu del preciu de la botella como del amenorgamientu del mercáu y de la capacidá de consumu. Dengún analís oxetivu pue resalvar que tando’l consumu sidre –la natural especialmente- básicamente circunscritu al nuesu país, el fechu de qu’una sesta parte de la población asturiana viérase forciao a emigrar nos postreros 20 años –la más activa y con más capacidá de consumu, nun lo escaezamos-, l’avieyamientu de la población, el paru, la precariedá llaboral, -y per ende l’amenorgamientu de la capacidá económica-, l’aculturización y los cambios nos vezos de consumu, provoquen una severu amenorgamientu del mercáu de la sidre, que nun se vio compensáu cola necesaria diversificación del productu, la entrada en nuevos nichos de mercáu, l’aumentu del turismu, o la esportación, que sigue adoleciendo de canales efeutives acullá de les que ca llagareru tea la capacidá de xenerar pelos sos propios medios.

Ye nidio que’l seutor de la sidre, igual qu’asocede con tolos seutores productivos, debiere cuntar con un Plan Estratéxicu que planifique y controle la so evolución y los posibles escenarios futuros. Esautamente como asocede col seutor llácteu, cárnicu, vitivinícola…etc. ¿Por qué non cola sidre? Porque’l seutor de la sidre ye básicamente un seutor asturianu, ensin mayor presencia a nivel estatal y ensin normativa na Xunión Europea, lo que fai qu’esos planes nun esistan a esos niveles, correspuendiéndo-y a un hipotéticu Gobiernu Asturianu la ellaboración de dichu Plan Estratéxicu; y anque n’Asturies namás teamos un “Principado” ye sobro elli que recai la responsabilidá d’ellaborar dichu plan, basándose nos pegollos que sofiten al seutor: pumareros, llagareros, sidreríes.

Ensin esi Plan Estratéxicu, el preciu la botella sidre ye una anéudota.

(Visited 686.638 times)

4 thoughts on “Entamu LA SIDRA 170

Comments are closed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies