Inicio > Uncategorised > Entamu LA SIDRA 165
Uncategorised

Entamu LA SIDRA 165

Entamu

Finó estupendamente’l mes d’agostu cola cellebración de la Fiesta de la Sidre de Xixón y darréu escomenzó un setiembre nel que Villaviciosa garró rellumantemente’l relevu cola so Fiesta de la Sidre, el Concursu de Sidre Casero, el Concursu Asturianu de Sidre, y les mui sidreres fiestes d’El Portal.

Setiembre avanza ente l’avezada sucesión de fiestes que tienen a la sidre como protagonista y enfoca nel so puntu final al eventu sidreru más internacional del país: El VII Salón Internacional de les Sidres de Gala, colos sos prestixosos premios SISGA, la Cena Gala a la qu’esti añu se-y amiesta’l Xardín de los Saborgos, la Xornada de Tastia Abierta al públicu, el I Alcuentru de Periodistes y Bloggers de la Sidre y la Xornada de Sumilleres… Una diversidá d’actividaes, que nesta edición non solo bate tolos récors de participación con más de mediu centenar de llagares asistentes, sinon que la representación internacional llega sumar más de 15 países, con asistencia de llagares de cuatro continentes. Nesta ocasión a los habituales europeos amiéstense otros veníos de Xapón, Sudáfrica y Estaos Xuníos… por nun mencionar la sinificativa presencia d’importaores de sidre qu’acuden a conocer de primer man el panorama sidreru internacional y a afitar contautos comerciales.

Na so sétima edición, el SISGA consiguió ser toa una referencia sidrera a nivel mundial, de tala miente que la participación nel mesmu nun ta en función d’un beneficiu económicu imediatu, sinon d’un prestixu y una promoción del productu col qu’Asturies afianza’l so lliderazgu mundial nesti seutor, namás llimitáu pola falta de sofitu istitucional d’un “Principando” etenramente ausente.

Pero hai muncho más, esti añu al SISGA acude una sinificativa representación istitucional xaponesa, británica, francesa ya italiana interesaos poles repercusiones económiques y sociales del nuesu eventu y dimpuestos a esplorar les posibilidaes de retroalimentación ente los estremaes países participantes. Tanto ye asina que’l propiu Ayuntamientu Xixón rializará una Recepción Oficial a estes autoridaes y esti añu tendremos el placer de cuntar cola presencia de la Sra. Alcaldesa de Xixón na Cena Gala.

Metantu, la ñatura sigue’l so ciclu y entama la pañada d’una de les más grandes collechones de los tiempos caberos los llagares van enllenándose de mazana… promesa d’un feliz futuru de sidre.

 

(Visited 1.226.274 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies