Inicio > La sidra > Revista > Entamu LA SIDRA 166
Revista

Entamu LA SIDRA 166

Entamu

Entamó’l mes cola postrer xornada del VII Salón Internacional de -les Sidres de Gala del qu’hai de destacar non solo’l so ésitu y la superación de los meyores oxetivos, sinón tamién l’escelente papel rializáu polos llagares asturianos nos Premios SISGA, alzándose con 18 de les 36 distinciones otorgaes, lo que tien especial méritu tratándose d’un xuráu internacional formáu polos mesmos llagareros participantes nel que llóxicamente la presencia asturiana ye minoritaria, sobromanera nesta edición na que se cuntó con una perimportante participación de llagares de cuatro continentes: Europa, África, Asia y América.

Y too darréu escomenzó Xixón de Sidre, ún de los eventos sidreros más emblemáticos que xune con aciertu a llagares y sidreríes al traviés de la gastronomía y la interaición social, con un acertáu programa que facilita la participación popular ya intégrala nel proyeutu faciéndomos ser protagonistes en llugar de meros consumidores. Un eventu nel que la cultura asturiana de la sidre vese potenciao en toles sos facetes y que reivindica tamién el papel de les sidreríes como espaciu social.

Asina mesmo, foi bien destacada la presencia de la sidre y la mazana nel Festival de la Mazana de Villaviciosa, y coincidiendo con ella, el Concursu de Sidre Casero Mundo Collada, nel que los meyores llagareros tradicionales de 20 conceyos asturianos presentaron la so sidre ufiertando una oportunidá única para prebar saborgos auténticos que dacuando paecen perdese nos procesos de los llagares industriales. Nesti sen wl llabor de l’Asociación pal Fomentu de la Sidre Tradicional Asturiana -entamaora de dichu concursu y de los que lu precieden y escueyen los representantes nel mesmu- nun pue ser más ponderatible, y dende equí reclamamos al “Principado” un sofitu rial a estes iniciatives.

Ta perbién declarar la Cultura Asturiana de la Sidre como Bien d’Interés Cultural, y taría meyor si cumplieren cola so pallabra y presentao la so candidatura pa ser reconocía como Padremuñu de la Humanidá pola UNESCO, pero a lo que nun puen sustrayese ye a la so obligación de sofitar eventos y asociaciones como les qu’acabamos de mentar, también, a l’Asociación d’Echaores, a los Concursos d’Echaores, al propiu Muséu de la Sidre…. por perbién que se tean faciendo les coses, el sofitu institucional ye imprescindible, y el “Principado” tien que responder.

(Visited 2.466.609 times)
Compartir

2 thoughts on “Entamu LA SIDRA 166

Dexa una rempuesta

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies