Inicio > Uncategorised > Entamu LA SIDRA 152
Uncategorised

Entamu LA SIDRA 152

ENTAMU

El mes d’agostu ta siendo un mes de los más completu, onde a los múltiples eventos sidreros, como la Fiesta de la Sidre de Navia, hai qu’amesta-y la práutica totalidá de fiestes y cellebraciones que tuvieron llugar a lo llargo de tol país y onde la sidre foi d’una manera o otra l’auténtica protagonista. La culminación va ser una de les principales fiestes de la sidre, la de Xixón.

Y ye que la Fiesta de la Sidre de Xixón consiguió llegar a ser un referente nel calendariu sidreru internacional gracies a un formatu afortunáu, nel que se desencolca de forma global la cultura asturiana de la sidre dende una perspeutiva dinámico y participativo. El récor d’echáu colleutivu añu tres d’añu ye en sigo mesmu un retu al que los asturianos nun podemos sustraemos, que sospriende y almira al visitante, y qu’acullá del actu en sí, espeya la nuesa voluntá colleutiva de vemos representaos pola sidre como elementu identitariu.

Nel mesmu sen, nun podemos dexar de mentar el Concursu de Sidre Casero de Villaviciosa, cuyu nivel de participación y calidá del productu resulta paradigmáticu y que supon un auténticu impulsu a los munchos concursos de sidre casero que van rializándose pela nuesa tierra, y antoxana de la convocatoria de los mesmos a nivel de toa Asturies, a cellebrar yá en setiembre en Villaviciosa.

Pero hai más, esti mes yá anuncia al prósimu, y el Salón Internacional de les Sidres de Gala apunta alto. Yá ta confirmada la presencia de llagares de toa Europa. Del 30 de setiembre al 2 d’ochobre Xixón tornará reivindicase como capital sidrera internacional al traviés d’ún de los eventos más orixinales na so concepción y conteníos, y que va sirvir d’esposición y desendolcu de l’alta gastronomía venceyada a les nueves modalidaes de sidre que s’ellaboren per tol mundiu.

Per otru llau, el relevu na direición y xerencia na DOP Sidre de Asturies yá se va viendo, y la nueva campaña “100% asturiana, 100% auténtica” consiguió francer moldes con una propuesta orixinal y de daqué manera polémica, que ta dando que falar. Aparte, y per primer vegada na so hestoria, van superándose vieyos roles provincianos y utilízase con normalidá la nuesa llingua. Esi ye’l camín, asturianos y auténticos 100%.

(Visited 2.466.583 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies