Inicio > Uncategorised > Entamu LA SIDRA 148
Uncategorised

Entamu LA SIDRA 148

la sidra 148ENTAMU

Escomienza fuerte la temporada sidrera, la Primer Sidre L’Añu marcó un inmeyorable empiezu, y el Sidracrucis dexó nidio qu’hai munches ganes d’esfrutar la sidre d’esti añu. Por si fora poco acaba presentase un nuevu productu deriváu de la sidre, Roxmut, el vermú de sidre. Amás la Sidre de Mazana Selieicionao califica la so primer collecha de sidre sobro la madre, amestándose d’esta miente a la campaña empecipiada por LA SIDRA va más d’ocho años de prestixiar la sidre nuevo, ensin trasegar.

Per otra parte entamen con intensidá los festivales sidreros. Acaba cellebrase’l de La Felguera y yá tenemos la Folixa de la Sidre en Ribeseya y la Preba de Gascona… Por si fora poco la presencia asturiana nel Apfelwein Weltweit foi más que destacada, con estand propiu de LA SIDRA, de la Fundación Asturies XXI y del Llagar Trabanco, con tres Premios Pomme d’Or. Tamién tuviemos nel Salón Gourmet, cumpliéndose coles espeutatives. Prósimamente Alimentaria, en Barcelona, va cuntar con llagareros asturianos presentando internacionalmente la nuesa bébora.

A too ello hai qu’amestar qu’a finales d’abril presentaráse’l SISGA’16 en Barcelona, nuna Cena Gala rializada en collaboración col Cientru Asturianu de Barcelona (CAB), y a la que van asistir destacaes presonalidaes del mundiu de la enoloxía y la gastronomía, lo mesmo que de la comunidá asturiana en Cataluña. Complementariamente a ello, tamién entamamos la I Folixa de la Sidre nel CAB… acumúlensemos los eventos.

Llamentablemente non too va tan bien. Lo del Muséu de la Sidre de Nava clama al cielu, y paez que lo poco que s’avanzó en 20 años d’hestoria pue acabar en ná, nun divertimento más pa turistes. Otru tantu podríemos dicir de la candidatura na UNESCO de la cultura asturiana de la sidre comu Padrimoniu Inmaterial de la Humanidá. El “Principado” nin ta nin se-y espera, nesti asuntu.

La sidre asturiano va a más, pero dende llueu non porque Asturies tea un gobiernu propiu que lu defenda. La incompetencia amiéstase a la falta de voluntá, y los resultaos son desalentaores. Menos mal que mos queda la sidre.

(Visited 1.265.404 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies