Inicio > Uncategorised > Entamu LA SIDRA 146
Uncategorised

Entamu LA SIDRA 146

lasidra146ENTAMU

Escomienza’l mes con nota prensa de la DOP anunciando la bona evolución de la “Sidre d’Asturies” nos toneles, y nun podemos menos qu’esperanzamos énte lo que mos abulta va ser ún de los meyores años no qu’a la sidre se refier.

Per otru llau, la presencia asturiana en Madrid Fusión y n’Enofusión, especialmente de la nuesa sidre, foi notable y l’iniciativa privada superó una vegada más el desdexamientu d’un “Principado” que tampoco equí nun foi quien a tar al altor requeríu. Ye igual, consiguióse una presencia más que digna y ye d’esperar que se vea espeyada nuna ca vegada mayor presencia y reconocencia de la nuesa sidre nel mercáu estatal.

El Muséu de la Sidre de Nava sigue igual, evolucionando a pior, ensin iniciatives, ensin proyeutu de futuru y ensin compromisu istitucional. Patética la postura de Javier Fernández llamando a los llagareros a que s’impliquen, cuandu una de les xides de l’actual situación ye l’incumplimientu de los compromisos económicos de la istitución que preside. Falten idegues, falta implicación y na llínia de la incompetencia, embaráxase la posibilidá de faer de lo que debiera de ser un bastión de la cultura asturiana de la sidre, un simple muséu-esposición pa turistes. Nun yera eso, nun ye eso.

Y siguiendo nel tarrén de los despropósitos, nun podemos menos que mentar la orixinalidá del Sporting de Xixón. L’equipu de la ciudá más sidrera del mundu dedicase a comercializar nes sos tiendes oficiales vinu de La Mancha. Paez que reivindicase comu equipu xixonés, y per ende asturianu, namás ye útil pa pidir sofitu. El cosmopaletismu y la deshonestidá a la hora de reivindicar l’asturianía son una llacra pa esti país.

Pero’l tiempu avanza, la sidre sigue formientando, y yá tenemos al delláu la Primer Sidre l’Añu (PSLA), la sétima edición d’esti eventu que marca l’entamu de la temporada sidrera asturiana. La PSLA, y el Sidracrucis, la procesión más sidrera del mundu… y el primer concursu de sidre nuevo, ensin trasegar, la Meyor Primer Sidre l’Añu.

Atrópensemos les bones perspeutives y eso que nun fiximos más qu’escomenzar l’añu. Un añu especialmente sidreru polo que tamos viendo.

 

(Visited 841.378 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies