Inicio > AS > ENTAMU LA SIDRA 135
AS

ENTAMU LA SIDRA 135

EDITORIAL LA SIDRA 135

 
L’aprebación de la declaración de la sidre comu bébora istitucional pol Conceyu de Xixón va marcar probablemente l’añu sidreru, non solo porque esti conceyu ye’l mayor y más dinámicu d’Asturies, sinón porque esta declaración ye la más completa de toles que vinieron aprebándose fasta agora polos estremaos conceyos asturianos.
 
La declaración aprobada pasa direutamente al tarrén de los fechos apurriéndo-y un componente sociu-económicu de primer orde al venceyalo a la imaxe de la ciudá y a la promoción turístico de la mesma, lo que va suponer un mecanismu de retroalimentación que redundará en beneficiu de los xixoneses en particular y de los asturianos en xeneral. Polo tanto tamos de norabona.
 
Y sigue l’actualidá de la sidre en Xixón, porque yá tenemos equí a la Primera Sidre l’Añu, l’eventu sidreru más especial col que s’empecipia la temporada sidrera asturiana y que recupera la primer sidre comu un valor enolóxicu y sociu-cultural, enartándose na dinámica de les espichas tradicionales, onde too xira alrodiu la sidre del añu y onde s’espresa la nuesa cultura de la sidre en tola so amplitú.
 
El Sidracrucis, la fervorosa procesión sidrera dimpuesta a arrincar, y siempres con escasez de places pa la demanda qu’hai. Otra forma de cellebrar la Selmana Santa, apta solo pa los bien sidreros, qu’esti añu, lo mesmo que la PSLA, va cuntar con sidre dulce y sidre ensin alcol, pa facilitar la participación d’astemios y menores de selce años.
 
D’otra manera, el “Principado” sigue dándomos dolores de tiesta, y magar l’aprebación definitiva de la so “llei de drogues” anistía parcialmente a la nuesa bébora patria, acaba cendiendo a les presiones de Madrid y prohibiendo’l consumu de sidre fasta los 18 años, un ensin sentíu dafechu si se tien en cuenta que la mocedá asturiano tien munchos menos problemes d’alcolismu que la española, por más que la so llexislación seya más restrictiva. El viciu de prohibir frente a la virtú d’educar, y el servilismu reinal del “Principado”. Ye lo qu’hai.
 
En fin, que ta tola sidre acabando formientar. Dicen los llagareros qu’esti añu muncho y bien, que la mazana yera bono y el tiempu aidó. Too son bones noticies, estupendes espeutatives.

(Visited 1.228.159 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies