Atención Sidreros!! Entama en toa Asturies la temporada de los Sidrocoles.
LA SIDRA.- Esti añu los Sidrocoles arranquen colos sos talleres sidreros nel meyor marcu posible, ufiertando una mayada popular na XVII Fiesta de la Mazana de Villaviciosa, folixa na que llevamos participando les tres caberes ediciones. Sedrá’l sábadu once d’ochobre, na Plaza’l Güevu.
La temporada entama un puquiñín más sero peles escueles y nun sedrá dica’l mes de payares cuando los Sidrocoles faigan los sos talleres pelos colexos d’Asturies. Dellos cientros espabilaron abondo y ya tienen reservada fecha, saben perbien que d’otra mena pue ser abegoso topar díe. Asina, el C.P, Santa Olaya de Xixón tien acutá cuasique dafechu la selmana del 9 al 13 con delles actividaes: pañar mazana, mayar, taller d’echar sidre y visita al llagar de Piñera, qu’abrirá les sos puertes a los más piquiñinos.
Tamién espabiló el C.P.Zorrilla, que repite la esperiencia de mayar colos sos escolinos d’entre 3 y 6 años.
Nos díis vinientes continuaremos informándovos de les feches y llugares de cellebración de tolos Sidrocoles que vaigan surdiendo.
