Inicio > Cultura sidrera > Emotivu VIII Axuntábense
Cultura sidreraDellosEventosLa sidraLlagares

Emotivu VIII Axuntábense

La Bona Confradería de los Siceratores d’Asturies nomó ayeri a los sos nuevos miembros de méritu, nun actu col que quinxo dar fuerza por que la cultura sidrera seya declarada Padremuñu de la Humanidá pola Unesco, la prósima seronda

LA SIDRA.- La ceremonia, que se celebró per primer vegada nel Muséu de la Sidre de Nava, empecipió cola intervención del alcalde navetu, Juan Cañal, y foi conducía por Ricardo del Río y Milio del Nido tres la cual procedióse al actu en sí, acoyendo a los nuevos confráderes de méritu, «Toos ellos arreyaos cola cultura sidrera asturiana como Padremuñu de la Humanidá y demostrando el nuesu sofitu a esa candidatura».

Los nuevos miembros de méritu, a los que se-yos reconoz el so sofitu a la sidre, a quien se punxo la capa, la montera picona que caracteriza a los miembros d’esta Confradería sidrera, y se-yos dió el preceptivu “golpe de mayu” fueron l’hosteleru Francisco Gámez, de Casta Tataguyo – Avilés- la periodista Aitana Castaño, y el llagar Sidra Fran, -con una emocionada alcordanza al so fundador, Victor Ramos, fináu’l pasáu mes de febreru-.

Nel actu, Francisco Gámez espresó el so agradecimientu y emoción por esta reconocencia, destacando que tola so familia materna ye d’El Remediu –Nava- y la illusión que-y fadría a la so mae -finada va unos años- velu recibir esta distinción.

Pela so parte, la periodista y escritora Aitana Castaño, bien contenta pol so nomamientu como sicerator de méritu estimó ésti de la meyor manera: interpretando ‘La Mariñana’, una de les composiciones del repertoriu de José González (El Presi), anguañu parte del padremuñu popular asturianu.

D’últimes foi-y impuesta la capa y la montera de los Siceratores a Marta Eola, en representación del colectivu “Muyeres” que preside, agrupación de dellos grupos d’investigación folclórico que llevaron –y lleven- la música tradicional asturiana dientru y fora de les fronteres asturianes, y que pa espresar el so agradecimientu parafrasió con ésitu’l nome del cantar popularizáu por Violeta Parra: “Gracias a la sidra que me ha dado tanto”

Asina mesmo, la Bona Confradería de los Siceratores d’Asturies tamién quinxo destacar a Cristina Navarro y Roberto Hernández, pareya recién instalada en Nava con aniciu en Albacete y Salamanca respeutivamente, pola so integración total nel conceyu y la cultura asturiana, como la de la sidre.

El preceptivu culín que selló’l xuramentu de toos ellos comprometiéndose cola defensa de la bébora patria asturiana foi maxistralmente echáu por Magdalena Sangrouber, campiona en 2121 del certame d’echaores del Festival de la Sidre de Nava.

Como nun podía ser d’otra miente, el ‘Axuntábense’ remató con una allegre espicha, cellebrada en Les Dominganes, onde nun faltó nin la sidre, nin la música y el baille asturianu, esto postrero bien d’agradecer al colleutivu “Muyeres”; la sidre por supuestu ‘Ramos del Valle’, del llagar Fran.

Emotivu VIII Axuntábense


(Visited 2.465.261 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies