Inicio > AS > Noticies > El TSXA conderga a la Conseyería Cultura frente a LA SIDRA
Noticies

El TSXA conderga a la Conseyería Cultura frente a LA SIDRA

La sentencia, que yá ye firme, obliga a dicha Conseyería a valorar de nueu tolos proyeutos presentaos a les sovenciones a medios de comunicación en 2015, por falta de motivación a la hora de valorar los  mesmos.

LA SIDRA.- Normalizar l’usu del asturianu y faelu visible socialmente ye un oxetivu al qu’intentamos contribuyir dellos medios de comunicación como la revista LA SIDRA y la web lasidra.as . Ello asina, cuando la Conseyería d’Educación y Cultura del “Principado” convocó nel 2015 una llinia de sovenciones a medios de comunicación pa la normalización social del asturianu, presentáronse en tiempu y forma los respeutivos proyeutos dau que se cumplía dafechu con toles condiciones de dicha convocatoria.

Por embargu, la citada Conseyería descalificó dambos proyeutos, ensin motivar la puntuación otorgada, llegando inclusu a puntuar con un ceru l’asturianu utilizáu, cuando un estudiu de L’Academia de la Llingua Asturiana, másima autoridá istitucinal en materia llingüístico, estimó correchu l’asturianu emplegáu tanto pola revista LA SIDRA como pola páxina ueb lasidra.as.

 

Ello asina, y por una custión de dignidá, la editorial presentó una demanda escontra la Conseyería de Cultura, que’l pasáu 9 mayu de 2017 la Sala de lo Contencioso-Alministrativo del Tribunal Superior de Xusticia d’Asturies dictó sentencia estimatoria de la mesma,  alcordando “retrotrayer les actuaciones al momentu anterior a la valoración de los proyeutos a la fin de motivar toos y caún de los separtaos rellativos, al menos, a aquellos qu’algamaron la sovención y los presentaos pol recurrente”, imponiendo amás les costes al “Principado”. Dicha resolución xudicial atalanta que la valoración dada nun ye suficiente “al nun aportar dengún datu, razón nin motivu que xustifique la puntuación asignada”.

Dende Espublizastur, editora de LA SIDRA y lasidra.as consideramos entós que la Direición Xeneral de Planificación Llingüística y Normalización del “Principado” nun cumple cola so obligación de normalizar l’asturianu –val ver los resultaos- sinon que rializa una política sobro’l movimientu llingüísticu, dando-y puxu a les postures político-llingüístiques prósimes al “Principado”: la non-oficialidá y la galleguización del ocidente col gallego-asturiano básicamente, arriendes de xenerar redes clientelares cuando non familiares. Una cenciella investigación sobro les sovenciones otorgaes por dichu muérganu alministrativu nos estremaos gobiernos del “Principado” daríe resultaos mui significativos. 

Más info

(Visited 2.464.635 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies