Inicio > Gastronomía > El Certame del Quesu Cabrales algama la so edición númberu 50, sumando dos record Guinness
Gastronomía

El Certame del Quesu Cabrales algama la so edición númberu 50, sumando dos record Guinness

Ayeri presentóse la nuea edición que tendrá llugar el postrer domingu d’agostu, tres dos años ensin puya, va escoyese la meyor pieza, cola que se va buscar superar la cifra de 20.500 euros

 LA SIDRA.- El Llagar de Colloto foi l’escenariu de la presentación de la 50 edición del Certame de Quesu Cabrales, a la qu’asistieron ente otros Enrique Rodríguez, Direutor agricultura y pesca, Dellegacion del Gobiernu n’Asturies; Begoña López, Direutora xeneral desendolcu rural; Jessica López, Presidenta DOP Cabrales;  José Sanchez, Alcalde Cabrales;-Andrea Fernández, propietaria quesería Arangas (ganadora del postrer certamen) ya Ivan Suárez, propietariu Llagar de Colloto (ganador de la postrer puya)

 El Certame del Quesu Cabrales algama esti añu la so edición númberu 50, tres dos años nos que nun pudo cellebrase por mor del andanciu. Nesti mediu sieglu de vida, la tradicional puya fíxose valedora de dos Guinness World Records al quesu más caru nuna puya. Féxolo amás de forma consecutivo, nos años 2018 y 2019, cuando s’estableció l’actual cifra record, de 20.500 euros.

Una bona racha qu’esti añu va buscar allargar, superando la cifra algamada en 2018 (14.300 euros) y 2019 (20.500 euros por dos quilu de quesu), dambes pagues por El Llagar de Colloto. Va ser, como ye costume, el postrer domingu d’agostu, día 28, en Areñes de Cabrales, que tornará convertise na capital mundial d’esti quesu tan especial. Fadrálo cola tradicional puya, onde establecimientos hosteleros d’Asturies y l’estranxeru (na postrer edición hebio, per primer vegada, un restorán de fora, el Seville’s de Dubai) puxarán por alzase col premiu a la meyor pieza quesera.

Enantes, el xuráu del concursu va escoyer el meyor quesu Cabrales del mundiu, puntuando parámetros como l’aspeutu de la corte (collor de la pasta y desendolcu del mufu penicillium), carauterístiques olfatu-gustatives (golor y saborgor, retrogustu, persistencia), la testura y d’últimes la impresión global fasta un máximu de 126 puntos. Sedrá entós cuando se conoza quién toma’l testigu de la Quesería Arangas, ganadora de la postrer edición.

Tamién el públicu aficionáu a la gastronomía va tener el so espaciu, con un gran mercáu con puestos nos que van poder alquirir esta preciada xoya culinaria única d’Asturies pola so intensidá carauterística, a la que s’amiesten les sos vetes verdeazulaes, y les sos notes picantes que namás puen dase nes cueves de los montes asturianos, en plenos Picos d’Europa. Nelles dase de forma natural una temperatura estable d’alrodiu los 10 graos y un mugor del 90%, favoreciendo’l desendolcu de mufu de la triba’l “penicillium”.

El quesu Cabrales foi ún de los primeros del estáu en ser amparaos por una Denominación d’Orixe, que contribuyó notablemente al so espardimientu y escomenzó a lluchar escontra’l fraude. Foi nel añu 1981, y anque la trámitación del Cabrales foi la primera n’empecipiase, les avezaes xestiones del Principáu’ permitieron que’l quesu Roncal allantrárase n’algamar esta figura de protección, apenes unos meses enantes. La fastera d’ellaboración d’esti productu entiende’l Conceyu Cabrales y dellos pueblos del Conceyu Peñamellera Alta.

El llechi emplegao llógrase puramente de les vaques, oveyes y cabres rexistraes na Denominación d’Orixe Protexida y cuyu ganáu paz en camperes de monte.


(Visited 2.465.606 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies