Inicio > Chigres > Cola hostelería asturiana
ChigresLlagaresOpinión

Cola hostelería asturiana

Movilizaciones de la Hostelería Asturiana

Nun ye comprensible que’l “Principado” allargue’l preslle de la hostelería asturiana teniendo en cuenta los datos d’evolución de la pandemia Covid19 nel nuesu país, muncho menos la falta de sofitu per parte d’una istitución que debiere velar polos intereses d’un seutor con importante pesu en nuestra economía

Dende LA SIDRA denunciemos en repitíes ocasiones el desdexamientu nel que’l “Principado” dexó al seutor de la sidre énte esta pandemia, poniendo como exemplu’l casu del País Vascu onde amás de les aídes de les sos respeutives diputaciones el gobiernu vascu destinó 50 millones n’aídes pa que los sos llagares puedan paliar los efeutos económicos de la pandemia, mentes que n’Asturies nun recibieron un res. Tamién denunciemos la risible aída que recibe’l seutor hosteleru asturianu pa compensar los efeutos d’esti nuevu preslle, poniendo como exemplu’l casu Murcia, onde se sofita de forma direuta a los sos establecimientos con 4.000 a 10.000 €  en función del númberu trabayadores.

Con éses, nesta ocasión vémosmos obligaos a denunciar lo inxustu que resulta la decisión del “Principado” d’allargar el preslle de la hostelería, teniendo en cuenta los datos oxetivos de la progresión de la pandemia Covid 19 n’Asturies, y lo que ye más grave, l’intentu de culpabilizar a la hostelería asturiana de la progresión del andanciu, probablemente pa esviar l’atención sobro la xestión que de la mesma vieno rializando’l gobiernu d’Adrián Barbón.

Oxetivamente los datos a díi de güei, con ser graves, son  meyores que na mayoría de les comunidaes que tienen abierto la hostelería, y hai que resaltar que no que cinca a la tasa positividá, caltúvose trés díis per debaxo del 5 % (criteriu de control de la OMS) y qu’anguañu atópase nel 5,44 per cientu. Nun son los datos que quinxéramos, pero en concenxa nun son especialmente malos; y magar ye ciertu que’l porcentaxe de cames UCIS disponibles ye baxu, ello nun se debe precisamente a la hostelería, sinón a unes polítiques bien determinaes que fueron escalando progresivamente la Sanidá Pública Asturiana, abrasando los sos recursos humanos y materiales, de tala miente que nun ye capaz de responder afayaízamente a la demanda sanitaria qu’esta pandemia provoca. Otru tantu podríemos dicir de les altes cifres de mortalidá, consecuencia d’esti escalamientu sanitariu, y del avieyamientu de la población asturiana como resultáu de la sistemática destruición del nuesu texíu sociu-económicu, y la consecuente emigración forciada de la mocedá asturiana; por supuestu ná d’ello responsabilidá de la hostelería asturiana.

Llegaos a esti puntu cabe rescamplar l’exemplar comportamientu de la hostelería asturiana que non solo venía respetando les dimposiciones sanitaries desixíes, sinón qu’en munchos casos incremetárenles de forma voluntario.

A lo cabero, y pa dexar les coses nel so sitiu frente a quien intenten faer de la nuesa hostelería cabeza de turcu pa eslir responsabilidaes propies, queremos recordar que:

  • Caltúvose confinaos a los asturianos innecesariamente demientres cerca de trés meses, cuandu la presencia de Covid equí yera pocu más que testimonial, atendiendo a l’alta incidencia de la pandemia nel Estáu español.
  • Tres el confinamientu non solo nun se procedió al preslle d’Asturies a la población con altos índices d’andanciu –como reconoció’l mesmu Adrián Barbón que yera necesariu faer- sinón que dende’l “Principado” procedióse a una campaña turística basada n’Asturies como “llugar seguru”, llogrando masificar turísticamente Asturies con población qu’actuó como vectores de tresmisión del virus.
  • Cuando, por cuenta de lo enantes reseñao, l’andanciu algamó una incidencia insoportable n’Asturies, Adrian Barbón foi incapaz de faese respetar en Madrid y consiguir un confinamientu que nesos momentos yera urxente pa evitar el so espardimientu.

Por too ello, dende LA SIDRA queremos reiterar el nuesu sofitu a la hostelería asturiana nestos duros momentos, denunciar la situación d’indefensión en que s’atopa, tantu como seutor, como individualmente caúna de les presones que dependen d’ella pa vivir, y xunímosmos a la desixencia d’unes compensaciones y aídes dignes, y a la demanda de criterios oxetivos, y non políticos, a la hora de decidir la so –esperamos prósima- reapertura.

(Visited 2.465.410 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies