Inicio > AS > Noticies > Castañón, Cortina, Trabanco y Viuda de Angelón, cuatro grandes nel XXX Salón de Gourmets
Noticies

Castañón, Cortina, Trabanco y Viuda de Angelón, cuatro grandes nel XXX Salón de Gourmets

Fasta’l stand d’Asturies averóse Santiago Menéndez de L.luarca, acabante llegar de Roma comu Conseyeru ante la FAO pa felicitar a los llagareros pol so llabor.

LA SIDRA.- Segundu díi de Salón de Gourmets onde los llagares asturianos tán esponiendo lo meyor de los sos productos. Son cuatro: Castañón, Cortina, Trabanco y Viuda de Angelón. Toos ellos allugaos nel stand d’Asturies. Yá dende primer hora de la mañana los asistentes a esti alcuentru asitábense nel espositor de Sidre Cortina pa ver cómu l’echaor Pablo De La Roz echaba culinos a quien-y los solicitara. Munchos d’ellos yá conocíen la sidre, anque hai que dicir, que munchos otros nun vieren enxamás l’arte d’echar sidre. “Son yá 18 ediciones viniendo a esti Salón, y l’escháu de sidre llama l’atención. Asina salimos nos medios de comunicación y sopelexamos la cultura de la sidre” siñaló Tino Cortina.

 

N’otru de los stands, el de Sidre Castañón, el vermú de sidre “Roxmut” sospriende, y enforma, a los que s’averen a prebalo. “Ye un productu pioneru que ta teniendo bien bona aceptación” indica Julián Castañón. Tamién ufierta pa tastiar la so sidre natural y la DOP Val de Boides. Coles mesmes, Francisco y Alfredo Ordóñez tuvieron al pie del cañón esplicando a quien s’avere les virtúes de les sos ellaboraciones. Hai de destacar que “Diamantes de Hielo”, la so sidre de xelu, recibió bien bones crítiques per parte d’asistentes y tastiaores.

 

Fasta’l stand d’Asturies averó Santiago Menéndez de L.luarca, acabante llegar de Roma comu Conseyeru énte la FAO. Demientres la so etapa comu Conseyeru de Mediu Rural n’Asturies, el so llabor foi clave pa llograr una denominación d’orixe pa la sidre. Ellí tuvo charrando amigablemente con Samuel Trabanco, de Sidre Trabanco; y darréu felicitó a tolos llagareros qu’allegaron a la XXX edición de Salón de Gourmets pola alta calidá de productos y por siguir apostando pola sidre.

(Visited 2.465.655 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies