Inicio > Cultura sidrera > Dellos > Calendariu asturianu, sidreru y folixeru
Dellos

Calendariu asturianu, sidreru y folixeru

L’almanaque foi creáu pol fotógrafu de la revista LA SIDRA David Aguilar Sánchez y la illustraora Tamara Albotros

LA SIDRA.- Tamara Albotros nació en Damascu, Siria, y David Aguilar un pocu más cerca, en Xaén. Pero dambos pudieron vivir de llenu la cultura sidrera asturiana yá que moren dende fai dellos nesta tierra. Y pa esti 2021 sacaron a la vienta’l ‘Calendariu asturianu, sidreru y folixeru’. Amás, David ye fotógrafu de la revista LA SIDRA: “a pesar de venir de fora d’Asturies, a lo llargo de los mios años equí, que yá son quince, tuvi la enorme fortuna de poder reparar de cerca nel mundiu la sidre. Fui y soi echaor, trabayu que tuvi que deprender como tantos otros echaores veníos de fora: porque nun queda más remediu pa poder trabayar n’hostelería y salir alantre. Pero dende fai un par d’años vengo dedicándome a la fotografía de manera profesional y, más concretamente, trabayando pa la revista. D’ende que pudiera allegar a distintos llagares y pumaraes pa retratar los procesos del pañáu, mayáu o caltenimientu de los llagares. Entá me queda enforma por deprender y reparar, pero dime cuenta de que yá diba teniendo un conxuntu d’imaxes que teníen un filu conductor, y Tamara y yo camentemos que yera una bona idega xunir estes imaxes nun calendariu”.

Asina, les semeyes que podemos atopar nesti trabayu van dende’l mayáu o’l pañáu de la mazana, pasando pola igua de toneles o imaxes del propiu esfrute de la sidre, como una realizada nel últimu récord d’escanciáu en Xixón nel 2019. “Tamién hai dalgún detalle d’un llagar caseru, porque la sidre faise en llagares grandes, pero tamién, y enforma, en casa” siñala David. Otros ellementu gráficos que podemos atopar nos calendarios son ilustraciones que representen estremaos ellementos de la cultura y la gastronomía asturiana rializaes por Tamara Albotros. Estes van dende un par de madreñes fasta’l faru de Ortigueira, pasando por un trisquel, muyeres baillando la danza prima, mazanes, flores del pumar, quesos, cañes de xardón o la ponte de Cangues d’Onís. “Consideramos que la unión de semeyes de temática sidrera con illustraciones que faen referencia a otros ellementos de la cultura asturiana daríen llugar un conxuntu vistosu y prestosu que mos fora acompangando a lo llargo del añu”, desplica Aguilar.

El calendariu pue alquirise por 17 euros, pa más información, esti ye l’enllaz: https://www.facebook.com/commerce/products/3555558491227594/

 

(Visited 989.937 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies