El sábadu 18 de marzu llevóse a cabu la IV edición del concursu La Meyor Primer Sidre L’Añu. Inscribiéronse 40 llagares y 8 fueron les sidres finalistes.
LA SIDRA.- El certame, entamáu pola revista LA SIDRA y la FUNDACIÓN ASTURIES XXI, tuvo llugar na sidrería xixonesa El Otru Mallu allugada na cai Sanz Crespo 15. La primer parte escomenzó a les 16:00 hores onde s’escoyeron les sidres finalistes que fueron ocho: Canal, Herminio, Estrada, Buznego, Juanín, Piloñu, Cabueñes y L’Allume. Nun principiu diben ser 5, pero hebio empate tocántenes a les puntuaciones.
Dempués d’un curtiu recesu de 15 minutos, entamó la final. Sidra Buznego alzóse col primer puestu dempués d’un complicáu desempate con Sidra Canal, que quedó la segunda y en tercer llugar hebio un empate ente Estrada y Cabueñes.
El xuráu tuvo presidíu por Manuel Bustu y costituyíu por Joaquín Fernández, Donato Xuaquín Villoria, Eloy Gómez, Ricardo García y Manuel Castro. Pal serviciu d’echáu cuntóse con Wilkin Aquiles, ganaor de del Campionatu Oficial d’Asturies en 2012 y 2013, amás de tar siempres dientru de los finalistes de dichu concursu.
La sidre premiao va ser la oficial de la VIII edición de la Primera Sidre L’Añu, la espicha más grande d’Asturies y que marca l’empiezu de la temporada sidrera. Cellebraráse del 13 al 16 d’abril nel Muséu del Pueblu d’Asturies en Xixón.
El premiu a La Meyor Sidre L’Añu ye l’únicu concursu que tien como protagonista la sidre ensin trasegar y que tien retribución económica –1.000 euros en sidre–. Por esti motivu asitióse como ún de los concursos de referencia de la nuesa bébora tradicional.
Dende va ocho años LA SIDRA y Fundacion Asturies XXI escomenzaron a trabayar pola recuperación d’esta triba sidra, que práuticamente esapaeciera del mercáu pola industrialización de los llagares y l’aplicación xeneralizada de los trasiegos. Ca vuelta son más los llagares que s’animen a comercializar esta sidre con una participación estable nel certame.
