Inicio > AS > Noticies > “Alimentos del paraísu natural” nel XXX Salón de Gourmets
Noticies

“Alimentos del paraísu natural” nel XXX Salón de Gourmets

13 empreses asturianes esponen los sos productos nesta Feria Internacional de l’Alimentación y  Bébores de Calida que se cellebra del 4 al 7 d’abril nel IFEMA de Madrid.

LA SIDRA.- La sidre torna al Salón de Gourmets. Cortina, Castañón, Trabanco y Viuda de Angelón son los llagares representantes d’Asturies nesti alcuentru que cellebra la so trixésima edición. Dende güei y fasta el xueves 7 d’abril más de 35 mil productos nacionales ya internacionales van tar espuestos na Feria Internacional de l’Alimentación y Bébores de calidá. Amás de los citaos llagares, otres 9 empreses asturianes allegaron al congresu: Agrovaldés, Asturex, Coasa, DOP Quesu Cabrales, Enastur, Manteguera de Tinéu, Mariscos Oviñana, Rey Silu y Xata Roxa. La mayor parte d’elles tán allugaes nel stand del “Principado”, nel pabellón 6 de la feria.

 

La naguración tuvo llugar pasaes les 11 la mañana y corrió al cargu de la ministra d’Agricultura, Alimentación y Mediu Ambiente en funciones, Isabel García Tejerina, quien destacó la calidá de los productos españoles nesta amuesa que se convirtió nun referente de primer orde de los productos gastronómicos y agroalimentarios, especialmente los que tán amparaos baxo distintivos de calidá.

Y xustamente nesa llínea escurrieron les declaraciones de la Conseyera de Desendolcu Rural  y Recursos Naturales demientres la so visita al stand del “Principado” pocu dempués de la naguración. María Jesús Álvarez sopelexó: “Un añu más Asturies ta presente coles sos produiciones como la sidre, la carne, el mariscu o los quesos. Munches d’elles con sellos de calidá, con allugamientos xeográficos protexíes, o con denominaciones d’orixe protexíes. Y toes elles amparables nuna marca de calidá ‘Alimentos del paraísu natural’ que queremos dar puxu de magar agora. Porque hai munches piqueñes produiciones n’Asturies cuya promoción esterior ye complicada pol so propiu tamañu y precisen una marca que les identifique. ‘Alimentos del paraísu natural’ amás, indica qu’Asturies ye un territoriu con valores naturales bien importantes. Estos valores tán tamién nes sos produiciones primaries, nos sos alimentos y nos sos productos ellaboraos.”

La revista LA SIDRA foi l’únicu mediu de comunicación presente que s’interesó por preguntar a la conseyera sobre les estorbises poles que traviesa’l procesu pa que la cultura sidrera asturiana seya reconocía comu Patrimoniu Cultural Imaterial de la Humanidá pola UNESCO. “Esti tipu de reconocencies suponen tiempu. Dimos el primer pasu, diólu el “Principado” la pasada llexislatura. Agora tamos na fase de completar la documentación pa dir avanzando. Sabemos qu’esti ye un procesu lentu, que nun se consigue d’un día pa otru. Tamos n’ello” siñaló.

Amás la revista LA SIDRA entrugó a María Jesús Álvarez sobro los problemes que lleva abasnando dende va dellos años el Muséu de la Sidre de Nava. La conseyera respondió igualmente que “tán trabayando n’ello”. “Ye una iniciativa qu’anque se venceya a una promoción como ye la sidre, ye tamién una iniciativa de tipu cultural y de tipu turísticu. Por tantu rique d’un abordaxe multidisciplinar, porque ye un gran emblema, non solo de Nava, sinón d’Asturies” dixo. Y tocantenes a la propuesta del alcalde Nava pa incluyilo dientru de Recrea, María Jesús siñaló que: “ye una de les llínees de trabayu, y yá digo, tamos trabayando n’ello” repitió.

Demientres el restu del díi les empreses asturianes ufiertaron a los asistentes lo meyor de los sos productos. Fora del stand del “Principado”, na zona de quesos gourmets, allugáronse Quesos Rey Silu y la Cooperativa Agrovaldés cola so seición de Quesos El Rebollín. Dambes tán participando nel certame Meyor Quesu d’España que se va desendolcar demientres les cuatro xornaes del alcuentru. 

(Visited 670.731 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies