Inicio > AS > Chigres > Agriduz recuperanza de la temporada sidrera
ChigresEventosLlagaresLlagaresLlagaresSidreturismu

Agriduz recuperanza de la temporada sidrera

A la natural satisfaición pola gradual apertura de chigres contrapónse la suspensión del Rally de la Sidre y parcialmente del Festival de la Sidre de Nava, ente otros eventos sidreros

LA SIDRA.- Si nun hai novedá’l próximu llunes 25 mayu, Asturies va pasar a la Fase II de la desesguilada d’esti llargu andanciu del coronavirus, que va permitir que los chigres puedan atender tamién nel interior, y non solo nes terraces. Asina, con munches llimitaciones y un elleváu costu económicu para la hostelería, tou paez indicar que la normalidá – la “nueva normalidá” sigún espresión acuñada pol gobiernu español-  va llegando, y que progresivamente vamos poder esfrutar de la sidre nel ambiente que-y ye propiu.

Pela contra, siguen dándose suspensiones d’eventos sidreros de primer orde, como ye’l Rally de la Sidre, que se suspende esti añu, anque se tán embaraxando alternatives pa cellebrar la Fiesta de la Sardina, y el Festival de la Sidre de Nava llinda toles sos actividaes públiques, llimitándose a caltener los premios a les meyores sidres d’Asturies y de Nava, y al concursu oficial d’echaores.

A too ello, por supuestu, hai que sumar les fiestes y romeríes tradicionales que nun pudieron cellebrase, y otres que tán cuantimenos nel aire: El Carmín, -Les Piragües, El Xiringüelu, San Timotéu… Les espectatives nun son bones, y nel meyor de los casos, de cellebrase va ser con bien de llimitaciones, colo que la recuperanza de la temporada sidrera va ser desaxeradamente penosa, y a estes altures los llagares siguen colos toneles enllenos y con series dificultaes para la so comercialización.

Vamos ameyorando, pero non tantu como quinxéramos. Va haber que tener paciencia, y mentantu aportunar na posibilidá que mos abren munchos llagares para llevamos la so sidre direutamente a la nuesa casa. Nun ye esáutamente lo mesmo, pero ye una bona opción daes les circunstancies.

(Visited 2.465.061 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies