Inicio > Cultura sidrera > Aconceyamientu pa encadarmar el comité direutor y científicu de la candidatura de la sidre a padremuñu de la humanidá
Cultura sidreraInternacional

Aconceyamientu pa encadarmar el comité direutor y científicu de la candidatura de la sidre a padremuñu de la humanidá

Güei martes cellebróse l’aconceyamientu pa la costitución d’un comité direutor y un comité científicu encargáu de dar puxu al procesu d’ellaboración de la candidatura de la cultura sidrera asturiana a Padremuñu Cultural Inmaterial de la Humanidá pola UNESCO. Nel aconceyamientu participaren Tino Cortina, presidente de la DOP Sidre d’Asturies; l’antropólogu Xuan de Con, l’etnógrafu Inaciu Hevia Llavona; el presidente d’Otea, José Luis Álvarez: Otilia Requejo, direutora de Padremuñu Cultural; Jesús Casas, direutor de Desendolcu Rural y Agroalimentación, asina como otros asesores científico-téunicos, integrantes del seutor hosteleru y más espertos na cultura y la hestoria de la sidre.

Presidió la conseyera de Desendolcu Social y Recursos Naturales que sopelexó qu’esiste un consensu alrodiu a les cualidaes que tien la candidatura de la cultura sidrera asturiana pa la so reconocencia. María Jesús Álvarez indicó que, a esti respeutu, dióse un pasu perimportante nel 2014 cuando’l Conseyu de Gobiernu declaró a la cultura sidrera asturiana Bien d’Interés Cultural. “Tamién nesi intre ficimos saber a la Comisión de Padremuñu Hestóricu la nuesa intención de presentar la candidatura na primavera del añu 2019” dixo la conseyera y continuó: “Agora de lo que se trata ye de conformar un equipu nel que s’integren presones espertes nesta cultura dende’l puntu vista de la hestoria, de la xeoloxía, de l’antropoloxía, de la etnografía, tamién de la comunicación, del mundiu empresarial, y por supuestu, presones que conocen los procedimientos alministrativos que tienen de rializase col oxetivu de que la presentación se desendolque de la meyor manera posible y que la documentación que se presente seya correcha, tea bien formulada y tea tolos ellementos que seyan precisos p’algamar la reconocencia”.

D’igual miente la conseyera sopelexó que tamién se rializarán iniciatives a la fin d’involucrar a la sociedá asturiana, pero, nun apartáu posterior. “Agora lo importante ye la definición de la candidatura, la so configuración y presentación. Pa eso, nun queremos cuntar namás coles nueses fuercies, queremos compartiles con presones que xenerósamente van participar con nós col oxetivu de la so reconocencia, que ye un oxetivu complicáu, pero que ta al algame con una candidatura tan potente como ye la cultura sidrera asturiana”.

Hai de remembrar que’l “Principado” anunció esta candidatura en 2010, y que mentes otres candidatures anunciaes al empar -como les falles valencianes- yá algamaron la reconocencia pola UNESCO como Padremuñu Inmaterial de la Humanidá, el “Principado” entá nun presentó nin la candidatura.

 

(Visited 2.466.147 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies