Inicio > Opinión > Entamu LA SIDRA de Febreru’20 (Nb. 194)
OpiniónSin categoría

Entamu LA SIDRA de Febreru’20 (Nb. 194)

Entamu

Ensin dubia ye la DOP Sidre d’Asturies la que lleva tol protagonismu d’esti mes, al presentar un balance añal especialmente positivu que reflexa una ca vegada mayor aceptación social d’esta marca de calidá, consecuencia d’una xestión afortunada qu’apuesta cláramente pola potenciación de la economía identitaria asturiana, y de xacíu pola diversificación –los datos de la sidre brut resulten especialmente interesantes- y la calidá del productu.

Un pocu más atrás, la cellebración de la Feria Internacional del Turismu en Madrid tamién mos dexó un bon saborgu de boca, con una presencia d’Asturies bastante digna, onde la sidre tuvo tamién el so papel. Sicasí ta claro que’l “Principado” entá nun asumió la potencialidá del Sidreturismo, na so doble vertiente, la gastronómica y la socio-cultural. A estes altures, la sidre non solo tien de tar presente de forma xeneral dientru la ufierta turística asturiana, sinón que tien de cuntar con un espaciu propiu dientru d’esa ufierta, cuntar con un auténticu protagonismu y costituyir un de les exes referenciales na presentación internacional de les bondaes del nuesu país.

N’otru orde de coses, dende’l “Principado” paecen escaecese del so anunciáu Plan Estratéxicu pa la Sidre y la Mazana, o polo menos llévenlo bien en silenciu, darréu que nun se sabe un res al respeutu. Hai esmolición pola ausencia d’actividá ya información, esmolición que poles mesmes xides tamién s’estiende al procesu pa la declaración de la cultura asturiana de la sidre como padremuñu inmaterial de la humanidá. Nun se sabe ná al respeutu, y polo poco que tresciende da la impresión de que nin siquier se llegó a presentar la candidatura en Madrid… mentantu pasa’l tiempu, y otres candidatures qu’escomenzaron la so andaura al empar que l’asturiana va años que consiguieron vese reconocíes pola Unesco.

D’otra miente, febreru ye un mes de curiada transición, los llagares atienden y afinen lo que va ser la nueva sidra d’esti añu, y van entetexendo a la so alredior un nial d’apuestes y esperances mentes aguardie que llegue esa primavera na que poder presentar la primer sidre l’añu.

VER REVISTA

(Visited 2.466.003 times)
Compartir

One thought on “Entamu LA SIDRA de Febreru’20 (Nb. 194)

Comments are closed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies