Inicio > Opinión > Entamu Especial Sidre d’Asturies DOP 2019
Opinión

Entamu Especial Sidre d’Asturies DOP 2019

Entamu

La presentación de la nueva collecha de la DOP Sidre d’Asturies permitió non solo esfrutar de les nueves sidres d’esti añu acoyíes a esta marca de calidá, sinón conocer los datos de lo que foi la evolución de la mesma demientres l’añu pasáu y empiezos d’esti.

En dambos aspeutos –el de la calidá de la sidre y el de la evolución de la DOP- les resultancies foron enforma satisfactories, de tala miente qu’amás d’encamentar esfrutar d’estes sidres, tenemos que felicitar al Conseyu Regulaor de la DOP Sidre d’Asturies por esi xorrecimientu del 73% nes vientes demientres 2018, y del 35% nos cinco primeros meses d’esti añu. Esperamos que se algamen les previsiones de llegar a los cinco millones de botelles a finales d’añu.

Tán faciéndose les coses bien, y tan consiguiéndose resultancies, y ye que dientru de la situación d’indefesión na que s’atopa’l conxuntu del seutor sidreru asturianu énte la inesistencia d’un Plan Estratéxicu de la Sidre y la Mazana, -magar los repitíos anuncios del “Principado” nesi sen-, la DOP Sidre d’Asturies cunta con unes llínies estratéxiques d’actuación que nos postreros años resultaron especialmente afortunaes, y que, en tou casu, permiten un control y un siguimientu de la mesma, lo que siempres redunda en beneficiu d’esta marca de calidá.

Hai de reconocer que la implicación del seutor hosteleru, les sidreríes especialmente, foi tou un aciertu, y namás cabe aplaudir la collaboración con OTEA. Asina mesmo pue dase por ganada la rempuesta de la sociedá asturiana, que nestos intres comparte de forma xeneralizao la necesidá d’esta DOP, y siente como propios los sos trunfos, superando ciertes reticencies iniciales.

Súpose poner en valor l’asturianía del productu, pero esi valor amestáu implica tamién unes responsabilidaes, y ye que la DOP Sidre d’Asturies tien de prauticar esa asturianía que tan acertadamente supo reclamar pa sigo, ya implicase más nel panorama cultural asturianu, avanzando haza una normalización nel usu de la nuesa llingua.

(Visited 2.464.645 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies