LaSidra.as

Cientos de neños y neñes participaron faciendo sidre y deprendiendo a echalo, nes actividaes que LA SIDRA organizó dientru'l Festival de la Mazana.

Dientro la programación del Festival de la Mazana d’esti añu, una actividá especialmente prestosa, camentada pa los más piqueños, pero na que tamién dellos pas y mas participaron con gustu.

Nuna tierra de llagareros, la reciella foi más que receutiva a la hora de ponese a facer sidre, y amosaron a les clares que, puestos a mayar (colos tradicionales mayos y el duernu) tien más emportancia les ganes que se pongan qu’el tamañu.

Munchos de los participantes pasaron les tres hores enteres que duró l’actividá mayando y trabayando col llagarín, comu auténticos profesionales. Prestaba ver como, si bien pa dalgunos yera daqué nueo dafechu, otros yeren braeros espertos na materia, teníen llagar en casa o mayaren dacuandu colos güelos.

Otros prefirieron el taller d’echar sidre (agua nesti casu, que la sidre nun ta pa tiralo) nel que Berto Leal fue desplicando, un a un, la téunica correcha pa facer aportar la sidre al vasu.

Tamien equí surdió la sospresa: un par de neños amosaron tener el pulsu y la prautica abondos pa presentase nos prósimos campionatos d’echaores. Impresionante.

Toos ellos tuvieron, amás, la oportunidá d’amazcarase con motivos sidreros, abondando les mazanes (variedá colloraona, verdialina o Ernestina, en función de les preferencies de collor), les reines de la sidre, los pumares faciales y les corones de mazana.

Arriendes de les actividaes infantiles, LA SIDRA tuvo presente col so puestín nel que ufiertamos información so la revista y les nueses actividaes, ocasión que munchos aprofitaron pa completar les sos coleciones colos numberos atrasaos o soscribise a la mesma.