LaSidra.as

Repasu a les actividaes sidreres del 2011 nel nuesu país, mes a mes, nel que si bien nun tan toles que son, sí que son toles que tan.

L’Añu que vien de finar foi un añu intensu pa los sidreros, con un calendariu bien apiertáu nel que, a pocu qu’un tuviere informáu, podía esfrutase d’un eventu sidreru a la selmana, en dellos meses fasta cuasique al díi.

Foi l’añu de les 10.000 presones prebando la sidre de más de 80 llagares na Primer Sidre, l’añu del nuéu récord de presones echando sidre al mesmu tiempu na Fiesta de la sidre’n Xixón, el del X Aniversariu de la Sidre d’Escoyeta, el primer añu del Salón Internacional de les Sidres de Gala, el de les decenes de xornaes gastronómiques acompangaes de bona sidre, el de les cien tasties y el de les milenta espiches.

Pocu más o menos, un añu como cualisquier otru nesta tierra de nueso na que la sidre ye’l pan nuesu de ca díe y nel que nun hai folixa ensín qu’un culín apaeza perende, un añu persidreru, sí, como lo foi 2.010 y como de xuru lo sedrá 2.012.

Pero 2.011 foi tamién l’añu en que la sidre salió d’Asturies, cola tiesta bien alta, camín d’Europa, participando de la man de LA SIDRA en dellos Festivales Internacionales, al tiempu que delegaos/es d’estremaos países decidiéronse a averase a esta mítica tierra de la sidre astur pa conocela más de cerca: nesi sen, 2.011 sedrá un añu que quedará grabáu pal futuru por facer camín.

Nes páxines vinientes atopamos un breve repasu a los principales actos sidreros del añu pasáu, non solo como alcordanza, sinón porque pue ser una guía afayadiza pa dir calculando feches pa esti añu -munches de les folixes repítense’n feches perasemeyaes.

Somos coscientes de que falten eventos asgaya, ye abegoso resumir l’actividá sidrera d’un añu nunes poques fueyes, sobre tou no que cinca a espiches y romeríes, que sedríen prauticamente imposibles de recoyer na so totalidá.

Tamién somos coscientes de que cualisquier otra folixa que se cellebrare esti añu n’Asturies, sidrera o non, tuvo la sidra como protagonista, malque nun apaeza nesti llistáu, que nun tienta de ser un llistáu esaustivu, sinón un resumín de los cabezaleros fechos y actos sidreros del añu.

En negrina apaecen aquelles actividaes entamaes por LA SIDRA o nes que se participó activamente.