Ye una receta d'El Fartuquín y nel platu apreciase la esperiencia en cocina

VER VIDIU

LA SIDRA.- Les persones que moren n'Uviéu ensin dulda conocen lo bien que se come n'El Fartuquín (carpio 19. Uviéu). Yo conózolu dende l'añu 2006, un poco dempués de la mio vuelta a Asturies. Foi nesi llugar onde comí la mio primer carne a la piedra. Enxamás nun la probara d'esta manera y como a min gústenme les carnes poco feches –pero a la mayoría de los mios amigos non– pos paecióme una escelente forma de poder esfrutar de la carne collorao según el puntu que queramos da-y.

Pero nesta ocasión quinxera emponderar otra de les especialidaes que tienen nesti restorán que cunta con unos 17 años de trayeutoria y que supo caltenese ufiertando una cocina tradicional, pero na que tamién s'inclúin ellaboraciones propies con toques contemporaneos.

 

Ye'l casu del so repollu relleno de cogordes y gambes. ¿Repollu? –Pensé cuando Mari, propietaria y al mandu de los fogones, describíame dalgunos de los sos platos pa un reportaxe que taba redactando–. Esta verdura, bien beneficiosa pa la salú, non siempres sabe preparase bien pa saca-y tol provechu. El puntu coción tien de ser l’afayaízu pa que la so testura tea una misquinina cruxente, y el so saborgu, dependiendo de con qué ingredientes se combine, pue pecar d'amargos (y nin qué dicir de golor que suelta cuando se cuez). Pero Mari díxome “fasta a les presones que nun-yos gusta'l repollu, pos esti sí”. Asina que probélu y teo que dicir qu'esfruté un montón.

En primer llugar porque va bañáu nun mueyu de pimientos, suavín, ná grasosu, pero sí saborgosu. Un detalle nes salsies qu'apreció muncho y ainda más si nun queremos meter caloríes de más a esta ellaboración que ta abondo bien permediada no que se refier a alimentos. El rellenu conxuntu de cogordes y gambes –amestáu al saborgu de los pimientos– prevoca una sensación llevemente dulce en boca que combina perbién col repollu en sí. Tolos ingredientes destaquen por sigo mesmos y nun se tapen. Ye un platu reondu y pa ná, pero pa ná, queda una con fame, de fechu ye perfechu pa compartir y pidir más platos, como les berenxenes con quesu provolone y xamón ibéricu –por casu–.

A destacar trés aspeutos más. Tola so carta ye apta pa celiacos y cunten con cursos y certificaciones pa que toos puedan comer tranquilos. L'otru ye'l so asitiamientu ya instalaciones. Ta nel Cascu Antiguu uvieín, a unos metros d'El Campillín, ente les sos parés predomina la piedra y la maera. Los elementos de decoración antiguos dan-y un aire bohemiu, pero con cierta elegancia, como'l de los llugares a los que se-yos llama “de solera”. Y el tercer puntu ye'l cuidu de la sidre. Les que tienen son Menéndez y la so DOP Val d’Ornón. El presonal qu'echa ye profesional, amás de que se guarda a la temperatura afayaízo.

duque_peq3.jpg

02822311
Güey / Today
Ayeri / Yesterday
Nesta Selmana /This Week
Na Caber Selmana /Last Week
Nesti Mes /This Month
Nel Caber Mes /Last Month
1897
7985
19062
1724513
207069
238631